Президент Ҳасан Руҳоний мамлакат парламенти аъзоларига Эрон АҚШнинг янгитдан жорий қилинган санкцияларини енгиб ўтишини айтди. Унинг айтишича, Теҳрон “Оқ Уйдаги Эронни кўра олмайдиган расмийларга” мақсадига ета олмаслигини кўрсатиб қўяди.
Руҳоний 28 август куни чуқурлашиб бораётган иқтисой бўҳрон, нарх-наво ва ишсизлик ошиб бораётган шароитда ҳукумат иқтисодиётни қандай бошқараётгани ҳақидаги саволларга жавоб бериш учун мамлакат парламентига чақирилди.
Президент жавоблари парламент аъзоларини қониқтирмади ва улар ишни кўриб чиқиш учун адлия органларига топширадиган бўлди.
‒ Иқтисодий муаммолар жуда оғир, аммо кўпчилик Ислом республикаси келажагига ишонмаётгани, унинг кучига шубҳа билан қараётгани ундан ҳам жиддийроқдир, ‒ деди Руҳоний маърузасида.
Тадбир телевидение орқали жонли намойиш этилди.
‒ Биз Америка ёки иқтисодий муаммолардан қўрқмаймиз, ‒ деди у яна. ‒ Муаммоларни албатта енгамиз. Эрон халқини ишонтириб айтаманки, биз АҚШнинг Ислом жумҳуриятига қарши фитнаси амалга ошишига йўл қўймаймиз.
Парламент аъзолари президентни ҳукуматнинг ишсизлик, иқтисодий ўсиш сустлиги, миллий пул бирлиги – риëлнинг тез қадрсизланиб кетаётганига оид муаммоларини ҳал эта олмаётгани, яна чегара оша контрабанда амалиётларига барҳам берилмаётгани борасида саволга тутди.
Руҳонийга кўра, қудратли Ислом инқилоби соқчилар корпуси (ИИСК) контрабандага қарши кураш учун ёрдамга чақирилган.
Парламент депутатлари жорий шароитда нима учун молиявий ислоҳот ўтказилмаётгани билан ҳам қизиқди. Улар 2015 йили дунёнинг етакчи мамлакатлари билан ядро дастури бўйича битим имзолангандан сўнг орадан икки йил ўтиб ҳам Эрон банклари нима учун глобал молиявий хизматлардан кам фойдаланаётгани сабабини сўради.
Парламент аъзолари фақат Руҳонийнинг банклар фаолияти ҳақидаги саволга жавобини қониқарли деб топди. Қолган масалаларни ҳал этишни адлия тизими ҳукмига топширишга қарор қилди.
Эрон парламенти президентга импичмент эълон қилиши мумкин. Олий раҳбар Оятуллоҳ Али Хаменейи Руҳонийга президентлик муддати охирига қадар лавозимида қолишга рухсат берилиши кераклигини айтди.
Парламент илк марта президентни сўроққа тутди
Мўътадил сиёсатчи сифатида қараладиган Руҳоний 2013 йили президент этиб сайланганидан бери илк марта парламентга чақирилди. Бу унинг иқтисодий ислоҳотига қарши қаттиққўл сиёсат тарафдорлари ғалабасидир.
Қонун чиқарувчилар унинг апрель ойидан бери 50 фоиздан кўп қадрсизланган риëлнинг қадрини тиклаш ва ортиб бораётган ишсизлик муаммосини ҳал қилиш борасидаги режалари билан қизиқди.
Президент парламентга келишидан олдин Масъуд Карбасян Иқтисодиёт вазири лавозимидан четлатилди. У сўнгги ҳафталарда Руҳонийнинг иқтисодчилар командасидан четлатилган тўртинчи амалдордир.
Жорий ой бошида унинг Меҳнат вазирига қонун чиқарувчилар ишончсизлик билдирган, июль ойида эса Марказий банк раиси билан ўринбосарининг паттаси қўлига тутқазилган эди.
Депутатлар АҚШнинг жорий йилда 2015 йилги ядро дастури битимидан чиқиши ва санкцияларни қайта жорий қилишида Руҳоний ва унинг командасини айбламоқда.
Руҳонийнинг қаттиққўл сиёсат тарафдори бўлган танқидчилари Теҳрон ҳукуматининг ядро дастури бўйича битим ва Ғарб билан яқинлашишига қарши бўлиб келган. Уларнинг кўпчилиги энди ундан истеъфо беришни талаб қилмоқда.
Мўътадил консерваторлар, жумладан, парламентнинг қудратли спикери Али Ларижонийнинг ҳали ҳам Руҳонийни қўллаб-қувватлаши айтилмоқда.
