Бугун Остонада "кун тартиби кенг" эканлиги айтилаётган учрашувга Марказий Осиё давлатлари раҳбарлари йиғилмоқда.
Саммитда Қозоғистон, Тожикистон, Қирғизистон ва Ўзбекистондан президентлар қатнашади, Туркманистон эса, парламент спикери даражасида иштирок этиши кутилмоқда.
Учрашув якунлари бўйича давлатлар раҳбарларининг биргаликдаги баёноти қабул қилиниши кутилмоқда.
Ўзбекистон Республикаси Президенти Шавкат Мирзиёев Остона шаҳрига 15 март куни келди.
Бу ҳақда хабар қилган ЎзА ахборот агентлигига кўра, Ўзбекистон Республикаси Президенти Шавкат Мирзиёевни Остона халқаро аэропортида Қозоғистон Республикаси расмийлари кутиб олди.
Ташриф доирасида Ўзбекистон делегацияси Марказий Осиё давлатлари раҳбарларининг биринчи маслаҳат учрашувида ҳамда Қозоғистонда Ўзбекистон йилининг расмий очилиш маросимида иштирок этади.
Шунингдек, Ўзбекистон Президенти Шавкат Мирзиёевнинг Қозоғистон Президенти Нурсултон Назарбоев билан учрашуви ҳам режалаштирилган.
Тожикистон президенти Эмомали Раҳмон 14 март куни Остонага расмий ташриф билан келди.
Қирғизистон президенти Сооронбой Жээнбеков, унинг маъмурияти хабар беришига қараганда, бугун Остонага учиб келди.
Учрашув арафасида Ўзбекистон президентининг матбуот хизмати Марказий Осиё мамлакатлари етакчиларининг учрашуви “Ўзбекистон президенти Шавкат Мирзиёвнинг таклифига биноан ўтказилиши” ва Остона бу учрашув учун майдон таклиф қилгани ҳақида хабар тарқатди.
Қозоғистонда 15 март куни Ўзбекистон Йилининг расмий очилиш маросими бўлиб ўтади.
Остонада ўтадиган мазкур тадбирда Шавкат Мирзиёев ва Нурсултон Назарбоев ишитрок этади. Икки давлат раҳбарларининг санъат усталари гала-концертида ҳам қатнашиши режалаштирилган.
Президент Нурсултон Назарбоев 2017 йил 25 декабрь куни журналистлар билан мулоқотида 2018 йилни Қозоғистонда Ўзбекистон йили деб эълон қилган эди.
