Линклар

Шошилинч хабар
29 март 2024, Тошкент вақти: 14:07

OzodDayjest: Фарғонада наша сотган суд ходими ушланди


Иллюстратив сурат.
Иллюстратив сурат.

Қичқириқ каналида чўкаётган 18 ёшли ўсмир қутқариб қолинди. Риштон туманлараро судида девонхона мудири бўлиб ишлаган шахс гиёҳвандлик моддаси савдоси устида қўлга олинди. Келинлар сепига “Ўткан кунлар” китобини қўшиб бериш таклиф этилди.

_____________________________________________________________

Қичқириқ каналида чўкаётган 18 ёшли ўсмир қутқариб қолинди

Тошкент шаҳри Олмазор туманидан оқиб ўтувчи Қичқириқ каналида чўкаётган 18 ёшли ўсмир ҳудуд профилактика инспектори, лейтенант Жамшид Абдулбоқиев томонидан қутқариб қолинди (“Постда”, 21 апрель). Ҳудудни кўздан кечириб юрган инспекторга ўсмирнинг чўкаётгани хабар қилингач, у иккиланмасдан ўзини анҳорга отган ва йигитчани қутқариб қолган. Маълум бўлишича, 2000 йилда туғилган Ҳасан Ниёзов ҳовлиси ёнидан оқиб ўтувчи каналдан сув олаётиб, оёғи тойиб анҳорга тушиб кетган. Қайд этилишича, лейтенант Ж.Абдулбоқиев ички ишлар тизимига ўтгунга қадар карате билан шуғулланган, 2009 йили Италияда ўтган мусобақада жаҳон чемпиони бўлган.

Қичқириқ каналида болаларнинг чўкиши аввал ҳам кузатилган. Масалан, жорий йил январида Олмазор туманидаги 134-мактабнинг 5-синф ўқувчиси Абдуллоҳ Рўзибоев дўстин қутқариш чоғи каналга чўкиб кетган эди.

Фарғонада гиёҳвандлик моддаси сотган суд мансабдори қўлга олинди

Фарғона вилояти Риштон туманлараро судида девонхона мудири бўлиб ишлаган шахс гиёҳвандлик моддаси савдоси устида қўлга олинди. Бу ҳақда Бош прокуратуранинг “Ҳуқуқ” нашри хабар беради. Қайд этилишича, исми ошкор этилмаган девонхона мудири воситачилик қилиб, танишига наша олиб берган. Наша олди-бердиси Фарғона шаҳридаги Хўжамағиз қабристонида амалга оширилган. Гиёҳвандлик моддаси савдосида яна икки киши қатнашган. Жиноят ишлари бўйича Қува туман суди гиёҳвандлик моддасини қонунга хилоф равишда сотган жиноий гуруҳ аъзоларига ахлоқ тузатиш ва озодликдан маҳрум этиш жазолари тайинлаган. Жиноий ишнинг бошқа тафсилотлари очиқланмаган.

Келинлар сепига “Ўткан кунлар” китобини қўшиб бериш таклиф этилди

Ўзбек келинларининг сепига атоқли адиб Абдулла Қодирийнинг “Ўткан кунлар” китобини ҳам қўшиб бериш лозим (“Инсон ва қонун”, 24 апрель). Қайд этилишича, грузин келинларининг сарпосига Шота Руставелининг “Йўлбарс терисини ёпинган паҳлавон” асари қўшиб берилади. Мазкур ҳолатдан ибрат олиб, ўзбек халқи ҳам миллий адабиётнинг мумтоз намунаси бўлмиш “Ўткан кунлар” романини ёш оилаларга тортиқ қилиши керак. Мақолада ёш оилаларга маънавиятни оширувчи бошқа китобларни ҳам ҳадя этиш лозимлиги, бунинг учун эса ФҲДЁ органларини китоблар билан таъминлаш учун фонд ташкил этиш мақсадга мувофиқлиги таъкидланади.

XS
SM
MD
LG