Ўзбекистон Жисмоний тарбия ва спорт давлат қўмитаси ўрнида Спорт ишлари вазирлиги ташкил этилди. Президентнинг тегишли фармонига асосан Шоакром Исроилов янги вазирликка раҳбар қилиб тайинланди.
Исроилов бундан олдин Тошкент Давлат физкультура ва спорт институти ректори эди. Маълумотларга қараганда, кейинги бир йил мобайнида Ўзбекистон Жисмоний тарбия ва спорт давлат қўмитасига раҳбарлик қилиб келган Рустам Қурбонов соҳадан умуман четлаштирилган. У 2017 йил февралида янги ташкил қилинган қўмитага раҳбарлик қилиб келаётган эди.
Шунингдек, ҳозирда тугатилган Жисмоний тарбия ва спорт давлат қўмитаси раис ўринбосари Искандар Жўраевга ҳам янги вазирликдан лавозим тегмаган.
Янги ташкил қилинган Спорт вазирлиги мулозимининг 14 февраль куни Озодликка айтишича¸ янги вазирликка ишга олинганлар касб ва малака жиҳатдан “спорт соҳасини яхши тушунмайдиган” кадрлардир:
- Бутун умр ўзбек спорти соҳасида ишлаб келаëтган киши сифатида айтадиган гапим шу: бир йилдан бери ўзбек спорти соҳасида регресс яъни орқага қайтиш кетяпти. Малакали мутахассислар¸ ўз соҳасининг усталари ўзбек спортини тарк этмоқда. Янги вазирлик таркибида спорт соҳасини яхши биладиганлар жуда оз. Профессоналлар ишдан четлаштириляпти. Тренерлар¸ спорт устозларига муносабат иш самарасига қараб эмас¸ балки раҳбарликка садоқат билан ўлчанмоқда¸ бу спорт учун ëмон симптом¸ деди мулозим.
Вазирлик қўмитадан яхши
Ўзбекистон Олимпия қўмитасида ишлайдиган мулозим эса, Ўзбекистон Жисмоний тарбия ва спорт давлат қўмитаси ўрнида Спорт ишлари вазирлиги ташкил этилганлигини олқишлади:
- Қўмита энди бу қўмита. Вазирлик бўлгандан кейин кўлам¸ қамров ҳам шунга яраша бўлади. Спорт катта маблағ сарфлансагина самара келтирадиган соҳа. Вазирлик тузилганидан кейин бу соҳага катта маблағ ҳам ажратилди. Эски раҳбарлар нега кетди деган саволингизга жавобим шу: Биринчидан, спорт соҳасидаги барча муаммолар¸ камчиликлар уларнинг номи билан боғланади. Уларга вақт ва имкон берилди¸ лекин эплай олишмади. Рустам Қурбоновни ( Ўзбекистон Жисмоний тарбия ва спорт давлат қўмитаси собиқ раиси) ëши ҳам бир жойга борди. Энди пенсияга чиқиб дамини олсин. Янги кадрларда тажриба йўқ деган гапингизда жон бор¸ лекин ишга садоқат билан ëндашиб чўнтакни эмас спорт ривожини ўйлайдиган кадрлар булар,- деди мулозим.
Спорт пул ювиш учун қулай соҳами?
Ўзбекистондаги спорт сиëсатига бевосита алоқаси бўлган бошқа мулозим эса, малакасиз кадрларнинг спортни ривожлантиришига ишонмайди:
- Спорт вазирлигидагилар бизга Мирзиëев карт-бланш беради дейишмоқда. Бу дегани спорт билан боғлиқ қурилишлар солиқдан озод қилинади, дегани. Бу дегани четдан олиб келинадиган спорт анжомлари бож тўламайди дегани. Агар етарли назорат бўлмаса, спорт вазирлиги давлат маблағларини ўмарадиган воситага айланиши ҳеч гап эмас. Спорт бу пул ювиш учун қулай соҳа. Олдин уларни МХХ кураторлари назорат қилар эди. Шу кунларда бу кураторлар чақириб олинди. Спорт соҳаси умумий тарзда прокуратура назоратига ўтди. Назоратнинг пасайиши эса ўз навбатида коррупцияга элтади,- дейди мулозим¸ Озодлик билан суҳбатда.
Эслатиб ўтамиз, Ўзбекистон Республикаси Президенти Шавкат Мирзиёевнинг 2017 йил 15 февралида имзоланган «Маданият ва спорт соҳасида бошқарув тизимини янада такомиллаштириш чора-тадбирлари тўғрисида»ги фармони билан Ўзбекистон Республикаси Маданият ва спорт ишлари вазирлиги тугатилиб, Ўзбекистон Республикаси Маданият вазирлиги ҳамда Ўзбекистон Республикаси Жисмоний тарбия ва спорт давлат қўмитаси ташкил этилганди. Бир йил ўтиб қўмита вазирликка айланди.
