Исроил бош вазири Бинямин Нетеняҳу БМТнинг Фаластин ҳудудидаги яҳудий қишлоқлари тўғрисидаги резолюциясига кескин ва қатъий жавоб қайтарилишини билдирди.
Нетеняҳу мазкур резолюцияни қўллаб-қувватлаган давлатларга нисбатан дипломатик ва иқтисодий босимлар Исроилнинг обрўсини оширади, деб ҳисоблайди. Унга кўра, БМТ Хавфсизлик кенегаши томонидан қабул қилинган резолюцияни Исроил қабул қилмаслигини қудратли давлатларга тушунтириш лозим.
23 декабрь куни БМТ Хавфсизлик кенгаши Исроилдан Фаластин ҳудудида яҳудий қишлоқларни кенгайтириш амалиётини тўхтатиш талаби билан резолюция қабул қилган эди. Мазкур ҳужжат учун Хавфсизлик кенгашига аъзо 14 давлат овоз берган, АҚШ эса бетараф қолган.
Бунга жавобан Исроил БМТ резолюциясини бажаришдан бош тортишини, ташкилотга тўловларни озайтиришини билдирган ҳамда бир қатор давлатлардан элчиларини чақиртириб олган.
Нетеняҳу АҚШ ҳукуматини фаластинликлар билан яширин равишда Исроилга қарши тил бириктиришда айблади. Вашингтон узоқ йиллардан бери биринчи марта Исроилга қарши қабул қилинган ҳужжатга норозилик билдирмади.