Туркия президенти Режаб Тоййип Эрдўғон 19 март куни сўзлаган нутқида ўтган ойда қўлга олинган немис журналистини “террорчилар агенти” деб атади.
“Бир ой мобайнида гўёки ўзини журналист деб атаган террорчилар агенти Германиянинг Истанбулдаги бош консулхонасида яшириниб ётди. Энди уни Германияга қайтаришни илтимос қилишмоқда”,- деган Эрдўғон немис журналисти ишини турк суди кўриб чиқшини билдирди.
Die Welt нашри мухбири Дениз Южел террорчиликни тарғиб қилишда гумонланиб Туркияда февраль ойида қўлга олинган эди. Германия канцлери Ангела Меркел журналистни озод этишни талаб қилиб келмоқда.
Қўлга олинган журналист масаласи Туркиянинг Европа давлатлари билан муносабатлари кескинлашган бир даврга тўғри келди.
Германия ва Нидерландия март ойи бошларида ўз ҳудудларида яшовчи этник тукрларга Туркия вазирлари иштирокида президент Эрдўғон қўллаб-қувватланиши кутилаётган митингларни ўтказишга рухсат бермагани ортидан муносабатлар ёмонлашган эди.