Amnesty International ташкилоти Эронни жиноятга қўл урган пайтида ўсмир бўлган шахсни қатл этиш режасини бекор қилишга чорламоқда.
Ташкилот 15 август куни эълон қилган билдирувда “Ёш бола ўлароқ қўлга олинган шахс қатл этилишидан бир неча кун ўтиб, жиноят содир этилганда вояга етмаган бўлган Меҳди Боҳлўлининг (16 август куни) эрталабга белгиланган қатли кўнгилни айнитадиган шафқатсизлик бўлиб, зудлик билан тўхтатилиши керак”, дейилади.
Боҳлўли 2001 йилда ўлим жазосига ҳукм қилинган. Ўша пайтда у 17 ёшда бўлган. Эрон расмийларига кўра, Боҳлўли ўшанда муштлашув давомида бошқа бир эркакни пичоқлаб ўлдирган.
Боҳлўлини қатл этиш бундан аввал уч марта кейинга қолдирилди. Охирги марта уни апрель ойида қатл этмоқчи бўлишган. Аммо Amnesty International ташкилотининг билдиришича, белгиланган кундан бир кун аввал уни қатл этиш кейинга қолдирилган.
10 август куни Эронда 21 ёшга тўлган Алиризо Тожикий қатл этилди. Тожикий қўлга олинганида 15 ёшда бўлган. Ўшанда Amnesty International у қотилликда ҳамда эркак киши билан жинсий алоқа қилганликда айбланганини билдирган эди.
Эрон қонунларига кўра, қотиллик, зўрлаш, содомия ҳамда қурол ишлатиб ўғрилик қилишда айдбор топилганлар ўлим жазосига ҳукм қилиниши мумкин.
Йил бошидан бери Эронда жиноят содир этилган пайтда 18 га чиқмаган бўлган камида тўрт шахс қатл этилди.
Amnesty International ҳозиргача жиноят содир этганида ҳали 18 кирмаган бўлган, шундай бўлса-да, ўлим жазосига ҳукм қилинган камида 89 эронликни аниқлаган.