АҚШ президенти Дональд Трамп 12 ноябрь куни Twitter саҳифасида қолдирган постларида Россия билан ижобий алоқалар "яхши нарса" экани ва Москва Украина, Шимолий Корея ва Суриядаги бўҳронларни ҳал қилишда "катта ёрдам бериши мумкин"лигини қайд этди.
13 кунлик Осиё сафари доирасида Ҳанойда бўлган президент Трамп Россияга нисбатан қўлланган санкцияларни "ўта оғир", деб баҳолади ва эндиликда бу санкциялардан "ларзага тушган ва азият чеккан дунёни тузатиш даври келди" деди.
АҚШ 2016 йилда президент сайловига аралашувига оид даъволар ортидан Россияга санкция қўллаган ва айни пайтда, Украинага нисбатан Россия агрессиясига қарши Европа давлатлари қўллаган санкцияларга ҳам қўшилган.
Ҳозирча, бу санкцияларни ўта оғир, деб баҳолаган АҚШ президенти келгусида уларни енгиллатиши мумкинми ёки бошқа режалар борми - бу ҳақда бирорта маълумот бергани йўқ.
АҚШ президенти Россиянинг Америка президентлиги учун сайловга аралашгани оид айбловни илгари сурган махсус хизматларига ишонишини таъкидларкан, айни пайтда, Россия президенти Владимир Путиннинг бу аралашувга оид раддияларида самимий эканига ишонишини ҳам қўшимча қилди.