Telegram ширкати ўз қароргоҳини Санкт-Петербургдан Дубайга кўчирди. Бу ҳақда Bloomberg нашрига Telegram мессенжери асосчиси Павел Дуров маълум қилди.
Дуровга кўра, Бирлашган Араб Амирликларида солиқлар мавжуд бўлмагани сабабли мана шундай қарор қабул қилинган.
Дуров инвесторлар унга Telegram мессенжерини 3-5 миллиард долларга сотишни таклиф қилганларини, бироқ унинг мессенжерни сотиш нияти йўқлигини айтди.
Унинг билдиришича, ҳозиргача бепул бўлиб келган Telegram 2018 йилдан бошлаб пулли хизматни йўлга қўйишни режалаштирмоқда.
Дуров Telegram шу кунгача унинг яна бир лойиҳаси “ВКонтакте” ижтимоий тармоғидан топилган даромад ҳисобидан молиялаштирилиб келинганини таъкидлади.
Bloomberg нашрининг ёзишича, Дуров криптовалюта келажаги порлоқ бўлишига ишонади. Шу сабабли у 4 йил олдин ҳар бири 750 доллардан бўлган 2 мингта биткоинни 1,5 миллион долларга сотиб олган. Бугунги кунда эса бу 2 мингта биткоин нархи 35 миллион долларни ташкил этмоқда.
2016 йили Forbes журнали биринчи марта Telegram асосчисини Россиянинг энг бой одамлари рўйхатига киритган эди. 2017 йилда нашр Павел Дуровнинг бойлиги 950 миллион доллар эканини ёзган.