Арманистонда парламентдаги “Елк” мухолифат партияси ўз лидери Никол Пашинян номзодини бош вазирликка кўрсатди. Пашинян бу лавозимга ўтириш учун парламентдаги депутатларнинг 55 овозини олиши лозим. Бироқ “Елк” партияси фақат 9 овозга эга.
Айни пайтда пойтахт Ереванда Никол Пашинян тарафдорларининг кўп минг кишилик намойишлари давом этмоқда. Митингчилар Пашиняннинг Бош вазир этиб тайинланишини талаб қилмоқда.
Мамлакатдаги энг йирик мухолифат гуруҳи саналган “Гуллаëтган Арманистон” партияси ўз тарафдорларини норозлик тадбирларига қўшилишга чақирди.
Еревандаги олий ўқув юртлари талаба ва ўқитувчилари аксариятининг жорий ҳокимиятга қарши норозилик чиқишларига қўшилгани айтилмоқда.
Арманистонда 11 кун давом этган норозилик акциялари ортидан Серж Саргсян 23 апрель куни бош вазири лавозимдан кетган эди.