Грузия бош вазири Гиорги Квирикашвили миллий телевидение орқали мурожаатида пойтахтда норозилик намойишига чиққан кишиларни вазмин бўлишга ва зўравонликка қўл урмасликка чақирди. Минглаб кишилар полициянинг тунги клубларда ўтказган рейдларидан норози бўлиб, мамлакат парламент биносига олдига йиғилган эди.
− На Грузия ҳукумати ва на халқи учун мамлакатда можаро келиб чиқиши ёки жамиятда бўлиниш юз бериши мақбул эмас, − деди Квирикашвили. – Қонун қўлловчи идоралар қонун ва тартибни сақлаш, намойишга чиқиш эркинлигини таъминлаш учун қўлидан келган барча ишни қилмоқда. Грузия ҳокимият идоралари наркотикфурушларга нисбатан қаттиқ туради, наркоманларга эса, инсонпарвар муносабатда бўлади.
12 май куни эрталаб юзлаб кишилар Тбилиси кўчаларига чиқиб, пойтахтдаги иккита тунги клубга полиция кечаси уюштирган рейдларга норозилик билдирди. Бунга уларнинг клуб эгаларига нисбатан керагидан ортиқ куч ишлатгани сабаб бўлди.
Ички ишлар вазирлиги вакилининг айтишича, унинг ходимлари Bassiani ва Cafe Gallery клубларида ўтказилган рейд вақтида 8 нафар “наркотикфуруш”ни қўлга олган.
Танқидчилар тадбирни полициянинг пиар-найранги деб атамоқда. Уларга кўра, полиция наркотикларнинг ноқонуний айланишини тўсишга қаратилган кескин қонунлар ижросини таъминлаш билан Грузия пойтахтда бизнеси ривожланаётган клубларни қўрқитиб қўймоқчи бўлди.
Айрим клуб эгалари наркотикларни полициянинг ўзи ташлаб қўйган бўлиши мумкинлигини айтмоқда.
Ҳокимият идоралари клублар яқинидаги кўчаларни эрта тонгда ёпмоқчи бўлган пайтда бир қанча норозилик намойишчиларини ҳибсга олди.
13 май куни кечқурун ўнлаб намойишчилар шаҳар марказида мусиқага ўйинга тушди. Ҳокимият идоралари парламент биноси олдида тикланган норозилик чодирларини бузиб ташлагандан сўнг улар норозиликни шу тариқа давом эттиришди.
Намойишчилардан бири журналистларга полиция хатти-ҳаракатини “иғво” деб атади. Лекин намойишчилар тонг отиши билан бир кун олдин тикланган чодирларни йиғиштира бошлаган полицияга қаршилик кўрсатмади.
Намойиш ташкилотчиларидан бири Анна Субелиани “Озодлик” радиосининг Грузин тилидаги хизматига маълум қилишича, улар талаблари қондирилмагунча намойишни тўхтатмайди.
Қора кўйлак кийиб, тўқ қизил боғич, баъзилари қора ниқоб тақиб олган радикал ўнг қанот ташкилот аъзолари “наркотикфурушлар” ва “LGBT (лесбианлар, гейлар, бисексуаллар ва трансгендерлар) тарғиботи”га қарши эканини айтмоқда. Улар “Ватанни ҳимоя қилиш учун миллий гвардия”ни тузишини эълон қилди.
Намойишчилар ўртасида можаро келиб чиқмаслиги учун полиция ўнг қанотчиларнинг парламент биноси олдига борадиган йўлини тўсиб қўйди. Кейинроқ полиция бошқа ўнг қанот ташкилоти раҳбари Гиорги Габедавани ҳибсга олди. У намойишчиларга таҳдид қилди ва полициядан улар тарафга ўтказиб юборишни талаб этди.
Намойишлар қўшни Арманистондаги кўча намойишларидан бир неча ҳафта ўтиб бошланди. Ўша намойишлар оқибатида Арманистон бош вазири истеъфога чиқди ва мухолифат етакчиси Никол Пашинян бош вазир этиб сайланди.