АҚШ президенти Дональд Трамп КХДР раҳбари Ким Чен Ин билан 12 июнь куни Сингапурда ўтказилиши режаланган учрашувдан воз кечди. Бу ҳақда Трамп Ким Чен Инга йўллаган мактубида билдирган.
Оқ Уй эълон қилган президент мактубида қайд этилишича, Шимолий Корея томонидан берилган, “хусумат ва очиқ душманликка асосланган” сўнгги баёнотлар узоқ кутилган учрашувни шу кунларда ўтказиш имконини йўққа чиқарган.
"Ушбу мактуб орқали Сизни Сингапур саммити бўлмаслиги ҳақида хабардор қилмоқчиман", дейилган ҳужжатда мазкур қарор ҳар икки томон фойдасига, бироқ тинчлик зарарига экани урғуланади.
Айни пайтда президент Трамп келажакда саммит ўтказилишини истисно қилмаган. “Муайян вақт ўтганидан кейин учрашув ўтказилишини кутиб қоламан ҳамда ҳозирда оилалари бағрида бўлган гаровдагиларнинг озод қилингани учун миннатдорчилик билдираман”, дейилади АҚШ президенти мактубида.