АҚШ президенти Дональд Трамп Шимолий Корея давлат раисининг ўринбосари Ким Янг Чол ва давлат котиби Майк Помпео ўртасида Нью-Йоркда 31 май куни ўтган музокара ижобий натижалар билан якунланганини билдирди.
Мазкур музокараларда Дональд Трамп ва Ким Чен Иннинг бўлажак учрашувига тайёргарлик кўриш масалалари муҳокама этилди.
Reuters агентлигига 31 май куни берган қисқа интервьюсида Трамп Шимолий Корея раҳбари Ким Чен Ин билан учрашувни 12 июнь куни Сингапурда ўтказиш фикрида собит қолаётганини таъкидлади.
- Мен жуда ижобий, жуда ҳам ижобий натижалар бўлди, деб ўйлайман. 12 июндаги учрашув жуда мазмунли бўлишидан умидворман, акс ҳолда бу учрашувни ўтказишдан мантиқ йўқ. Лекин бир марта учрашгандаёқ барча муаммоларни ҳал қилиш мумкин эмас, менимча, иккинчи, учинчи учрашувлар ҳам бўлади. Балки бўлмаслиги ҳам мумкин,-деди Трамп.
Трампнинг айтишича, Шимолий Корея делегацияси унга Ким Чен Иннинг мактубини ҳам олиб келган. Трамп бу мактуб 1 июнь куни ўзига топширилишини кутаётганини айтди.
Аввалроқ 31 май куни Шимолий Корея давлат раисининг ўринбосари Ким Янг Чол музокаралар ўтказиш учун Нью-Йоркка келгани хабар қилинган эди.