Тожикистонда 29 июлда велосипедда сайр қилаётган хорижлик сайёҳларнинг ўлдирилишига алоқадорликда гумонланаётган 5 шахс қўлга олинди.
Тожик ҳуқуқ-тартибот тузилмалари Россияда ишлаётган 20 нафар тожикистонликни ҳам мазкур жиноят иши доирасида сўроқ қилиш учун Душанбега қайтармоқчи.
Тожик расмийларининг 16 августда билдиришича, сайёҳларнинг ўлимида гумонланаётган 5 шахс ўтган ҳафтада Норак шаҳрида қўлга олинган. Улар 29-30 июль кунлари ҳужумчиларни қўлга олиш жараёнида содир бўлган отишмада ҳалок бўлган гумонланувчилар ака-ука Аслиддин ва Жафар Юсуповлар билан WhatsApp орқали алоқада бўлган.
31 июль куни Тожикистон ички ишлар вазирлиги ўз баёнотида хорижлик сайёҳатчиларга Ислом уйғониш партиясининг фаол аъзоси Ҳусейн Абдусамадов раҳбарлигидаги гуруҳ ҳужум уюштирганини эълон қилган эди. Партия бу айбловни рад этган. Айни пайтда ҳужум учун масъулиятни “Ислом давлати” гуруҳи ўз зиммасига олгани билдирилганди.
29 июль куни Тожикистон жанубидаги Данғара туманида маҳаллий вақт билан 15.30 велосипедда саёҳатга чиққан Нидерландиянинг бир фуқароси, Швейцариянинг бир фуқароси ва икки нафар америкалик ўлдириб кетлиган эди.