Чеченистоннинг Шали ва Грозний шаҳарларида 20 август куни полициячиларга қарши уюштирилган ҳужумлар юзасидан жиноят ишлари очилди. Ҳужум қилганлардан 4 нафари отиб ўлдирилгани хабар қилинмоқда.
Чеченистон ахборот вазири Жамбулат Умаровнинг билдиришича, энг ёш ҳужумчининг ёши 11да, энг катта ҳужумчи эса 17 ёшда бўлган.
Грознийда йўл полициячисининг устига автомобилини ҳайдаган икки ўсмир отиб ўлдирилган. Яна икки ҳужумчи эса Шалида полиция томонидан отиб ўлдирилди. Чеченистон Ички ишлар вазирлиги отиб ўлдирилганларни «жанггарилар», деб атади.
Айрим хабарларда айтилишича, ҳужум пайтида бир полициячи ҳалок бўлган, уч полициячи яраланган.
Мазкур ҳужум учун масъулиятни "Ислом давлати" гуруҳи ўз зиммасига олгани тўғрисида гуруҳга мансуб бўлган Amaq агентлиги хабар берди. Бироқ агентлик бунинг исботи сифатида бирорта далил келтирмади.
Айни пайтда Маккада бўлган Чеченистон президенти Рамзан Қодиров воқеани “халқни мамлакатда ҳужум қилишга қодир бўлган кучлар борлигига ишонтириш учун қилинган соҳта ҳаракат” деб баҳолади.