АҚШ президенти Дональд Трамп адвокати Майкл Коэн Манхеттен федерал судида сайлов пайтида қонунбузарликларга йўл берганини тан олганидан бир кун ўтиб бу масалада тушунтириш берди.
21 август куни Коэн Трампнинг сайлов штаби бюджетидан порноактриса Стефани Клиффордга, модель Карен Макдугалга Трамп билан ишқий муносабатда бўлгани тўғрисидаги маълумотларни ошкор этмасликлари учун катта миқдорда пул тўлаб берганини тан олган эди. Буни шарҳлаган Трамп:
-Бу ҳақда мен кейинроқ билиб қолдим. Бир нарсани тушунишингиз керак, бу ишни Коэн қилди. Сайлов штаби молиясини бошқа нарсага ишлатиш жуда катта воқеа. Лекин бу пуллар менинг ҳисобидаги маблағлардир. Биз белгиланган меъёрдан ортиқча пул ишлатганимиз йўқ,-деди Трамп.
Трамп 22 август куни Twitter саҳифасида Коэнни прокурорлар босимига дош бера олмай қолган “ёмон адвокат”, деб атади. Трампга кўра, Коэн сайлов штаби бюджетидан ўзгаларга пул тўлаб берганини жиноят сифатида баҳолаб бўлмайди.
Коэн Манхеттен судида бу тўловларни Трампнинг кўрсатмасига биноан амалга оширганини айтган эди.
Вашингтон судининг Ҳакамлар ҳайъати аввалроқ президент Трампнинг сайлов штаби бошлиғи бўлган Пол Манафортни билдирилган 18 айбловнинг 8таси бўйича айбдор деб топган эди.
Мазкур суд жараёнлари 2016 йилдаги АҚШ президентлик сайловига Россиянинг аралшагнлиги ва Трамп Россия билан тил бириктиргани тўғрисидаги иддаоларни текшириш доирасида ўтказилмоқда.