Туркманистонда совет даврида қурилган электр станцияси қайта таъмирланиб, кенгайтирилди. Эндиликда мамлакат Афғонистон ва Покистонга электр энергияси экспорти кўламини оширишга умид қилмоқда.
8 сентябрь куни станциянинг очилиш маросимида иштирок этган президент Гурбангули Бердимуҳамедов таъмирлаш ортидан станция қўшни давлатларга йилига қўшимча 3 миллиард кВт соат электр энергиясини экспорт қилиш имконига эга бўлганини таъкидлади.
Станцияни кенгайтириш ишларини Туркиянинг Calik Holding ҳамда АҚШнинг General Electric ширкатлари амалга оширган.
Туркманистон кейинги йилларда газ экспортига бўлган қарамликдан қутилиш учун ўз иқтисодини диверсификация қилишга ҳаракат қилмоқда.
2016 йил Россия туркман газини олмай қўйган. 2017 йил бошида эса Туркманистон Эрон билан газ экспорти масаласида келиб чиққан келишмовчилик ортидан газ экспортларини тўхтатиб қўйди. Эронга экспорт тўхтаб қолганидан кейин, Хитой туркман газининг ягона харидорига айланди.