Туркманистонда 2019 йилнинг 1 январидан электр қуввати, газ, сув ва туз пулли бўлади. Бу ҳақда Озодлик радиоси туркман хизмати “Хроники Туркменистана” агентлигига таяниб хабар берди
Президент Гурбангули Бердимуҳаммедов имзолаган фармонга асосан 2019 йилдан бошлаб “Туркманистон халқини электр энергияси, газ, ичимлик суви ва туз билан енгиллаштирилган тартибда таъминлаш бекор қилинади”.
Мутахасислар бундай фармоннинг қабул қилиниши “мамлакатда юзага келган иқтисодий таназзул билан боғлиқ”, демоқдалар. Бунга иқтисодий сиёсатда йўл қўйилган хатолар, бюджет даромадларининг озайгани, коррупциянинг кенг қулоч ёзгани сабаб қилиб кўрсатилмоқда.
Туркманистонининг биринчи президенти Сапармурод Ниёзов 1992 йилда аҳолини электр энергияси, газ, ичимлик суви билан бепул таъминлаш тўғрисидаги фармонни имзолаган эди. Дастлаб бу енгиллик 10 йилдан сўнг бекор қилиниши режалаштирилган. Бироқ кейинроқ ҳукумат бу фармоннинг амал қилиш муддатини 2030 йилгача узайтирган эди.