АҚШ вице-президенти Майк Пенс 4 сентябрда Вашингтондаги Хадсон институтида Қўшма Штатлар олиб бораётган сиёсат юзасидан қилган чиқишида “Хитой Америкада ўз таъсирини кучайтириш учун ҳар қандай йўллардан фойдаланмоқда”, деб айтди.
-Хитой Коммунистик партияси Америка ширкатлари, киностудиялари, университетлари, аналитика марказлари, нашрлар ва журналистлар, маҳаллий, давлат ва федерал амалдорларни рағбатлантириш ёки босим кўрсатиш, таҳдид қилиш воситасида ўзига бўйсундирмоқчи. Хитой Америка жамиятига таъсир кўрсатиш юзасидан мисли кўрилмаган ҳаракатларни олиб бормоқда. Бу 2018 йилнинг ноябрида ўтадиган конгрессга сайловлар ва 2020 йилда ўтадиган президентлик сайловларига таъсир қилиш ҳаракатидир. Очиғини айтадиган бўлсак, Хитой Трампдан бошқа президентни хоҳламоқда,-деди Пенс.
АҚШ вице-президентига кўра, Хитой бу мақсадларни ишга ошириш учун “тарғиботчи агентлари”ни жалб қилган.
Пенснинг айтишича, АҚШ разведкаси Хитой президент Дональд Трампнинг савдо сиёсатини бекор қилиш йўналишида Америкадаги турли сиёсий кучлар ўртасидаги келишмовчиликлардан фойдаланаётгани тўғрисидаги маълумотларга эга.
Аввалроқ Оқ Уй Хитойни тижорий жосуслик ва интеллектуал мулкни ўғирлашда айблаган эди.
Bloomberg нашрининг ёзишича, Хитойдан АҚШга олиб кирилаётган айрим компьютер платаларида “жосус микрочиплар” борлиги аниқланган.