Украинанинг 27 вилоятидан 10тасида 28 ноябрдан бошлаб ҳарбий ҳолат кучга кирди. Ҳарбий ҳолат жорий этилган вилоятларнинг барчаси Россия билан чегарадош.
Россия 25 ноябрь куни Керчь бўғозида учта украин кемасига ўқ отгани, кейин эса 24 нафар денгизчи билан бу кемаларни ҳибсга олгани ортидан президент Порошенко фармонига асосан жорий этилган ҳарбий ҳолат 30 кун давом этади.
Поршенко NBC телеканалига берган интервьюсида бу борада:
-Биз ўз демократиямиз учун курашни давом эттирамиз, ўз еримиз учун курашни давом эттирамиз. Руслар бизга ҳужум қиладиган бўлса, қаттиқ пушаймон бўлади,-деб айтди.
27-28 ноябрь кунлари Россия томонидан аннекция қилинган Қрим судларида рус ҳарбийлари томонидан ҳибс қилинган 24 нафар украин денгизчисининг ишлари кўриб чиқилди. Суд уларнинг барчасини икки ойлик қамоққа ҳукм қилди.
Кремль бу билан ҳалқаро ҳамжамиятнинг украин денгизчилари ва кемаларини озод қилиш чақириғига эътибор бермаганини намойиш этди.