АҚШ президенти Дональд Трамп Аргентинада ўтадиган «Катта йигирматалик» раҳбарлари саммити доирасида Россия президенти Владимир Путин билан ўтказилиши режаланган учрашувни бекор қилди.
Вашингтоннинг билдиришича, бунга Россия томонидан Керчь бўғозида учта украин кемасига ҳужум қилингани ва кемаларнинг экипаж аъзолари билан биргаликда ҳибсга олингани сабаб бўлган.
-Президент Дональд Трамп бу масалага муносабатини аниқ билдирди: Украина кемалари ва денгизчилари ватанига қайтарилиши керак. Биз бу ҳафтада гувоҳи бўлган агрессия қабул қилиб бўлмайдиган ҳолатдир ва буни тушуниб етишлари учун кучли мужда жўнатилди, -деди АҚШ Давлат департаменти матбуот котибининг ёрдамчиси Роберт Палладино 29 ноябрь куни ўтган матбуот анжуманида.
Айни пайтда Украина президенти Петро Порошенко Германияда чиқадиган Bild газетасига 29 ноябрь, эрталаб берган интервьюсида НАТОни Украинани ҳимоя қилиш учун ўз кемаларини Азов денгизига жўнатишга чақирди.
25 ноябрь куни Украинанинг учта ҳарбий кемаси Керчь бўғозида Россия ҳарбийлари томонидан ўққа тутилган ва қўлга олинган эди. Қўлга олинган 24 нафар денгизчининг ҳар бири Симферопол суди ҳукми билан икки ойданга қамалди.
Мазкур воқеа ортидан Украинада 28 ноябрдан бошлаб 30 кун муддатга ҳарбий ҳолат жорий этилди. Халқаро ҳамжамият Россиядан вазиятни кескинлаштирмасликни ва қўлга олинган денгизчилар ҳамда кемаларни озод қилишни талаб этмоқда.