Россия икки ой ичида ядровий қуролларни қисқартириш бўйича 1987 йилда эришилган оралиқ шартномага амал қилишга қайтмаса, АҚШ шартномада белгиланган ўз мажбуриятларини бажаришни музлатиб қўяди.
Бу ҳақда АҚШ Давлат котиби Майк Помпео 4 декабрь куни Брюсселда ўтган НАТО иттифоқчилари учрашувидан сўнг матбуотга маълум қилди.
-Мазкур шартнома юзасидан эришилган муваффақиятлар қандай эканидан қатъий назар бугун биз русларнинг алдоқчилигига қарши тура олишимиз керак. Россия шартномадаги мажбуриятларини бажармаяпти,- деди Помпео.
1987 йилда имзоланган шартномага асосан АҚШ ва Россия 500 километрдан 5000 километргача бўлган масофага отиладиган баллистик ракеталарни ишлаб чиқармаслик ва синовдан ўтказмаслик мажбуриятларини олган.
Дональд Трамп октябрь ойида Москва бу мажбуриятни бажармаётганлигини, аксинча янги қанотли ракета тизимини ишлаб чиқараётганини айтган эди.
SSC-8 ёки Novator 9M729 деган ном остида қанотли ракета ишлаб чиқараётган Россия шартнома мажбуриятларига қатъий амал қилиб келаётганини билдирган.