Афғонистон президенти матбуот котиби сўзларига кўра, мамлакатдаги АҚШ ҳарбийлари сонининг кескин озайиши Афғонистондаги хавфсизлик вазиятига катта таъсир кўрсатмайди.
Аввалроқ АҚШ матбуоти президент Дональд Трамп Афғонистондаги АҚШ ҳарбийларни сонини кескин қисқартириши ҳақида хабар қилган эди. Айрим нашрлар исми ошкор қилинмаган расмийлар бундай қарор аллақачон чиқарилганини билдиргани ҳақда ёзди.
Президент Ашраф Ғанининг матбуот котиби Ҳарўн Чахансурий:
- Уларнинг Афғонистондан чиқиб кетиши хавфсизликка таъсир кўрсатмайди, чунки тўрт ярим йилдан бери Афғонистон вазиятни бутунлай бошқариб келади, - деди.
20 декабрь куни The Wall Street Journal газетаси юқори лавозимли АҚШ расмийси президент Трамп “конфликтларни тугатиш бўйича бажариш мумкин бўлган вариантлар” ҳақида билишни исташини таъкидлаганини хабар қилган эди.
AFP агентлигининг хабар беришича, яна бир расмий Афғонистондаги Америка ҳарбийлари сонини кескин қисқартириш қарори аллақачон чиқарилганини таъкидлаган.
Бу хабарлардан бир кун аввал Трамп Суриядан барча АҚШ ҳарбийларини чиқаришини айтиб, кўплаб АҚШ сиёсатчиси ғазабига учраган эди. АҚШ Суриядан “Ислом давлати”га қарши халқаро коалицияга етакчилик қилиб келади.