Қирғизистон пойтахти Бишкекнинг бош майдонида 17 январь куни юзлаб одамлар хитойлик мигрантларга қарши намойиш ўтказди.
Митингда норозилар қирғиз ҳукуматидан мамлакатдаги хитойлик мигрантлар сонини кескин камайтиришни, уларга Қирғизистон фуқаролиги бериш амалиётини тўхтатишни талаб қилди.
Намойишда 500 нафардан 2 минг нафаргача одам қатнашгани айтилмоқда. Бишкекда бундай норозилик акциялари бир неча ой аввал Хитойда этник қирғизларга босим кўрсатилаётгани ва улар “қайта тарбиялаш лагерлари”га қамалаётгани тўғрисидаги хабарлар ортидан ўтказила бошланди.
Намойишлар кўпайгани ортидан президент Сўўрўнбай Жээнбеков 11 январь куни “қирғиз-хитой ҳамкорлигига ҳалақит қилаётган одамлар суд томонидан жазоланиши”ни айтган.
БМТнинг 2018 йил август ойида ўтказган текшируви натижасида Шинжон-Уйғур мухториятида 1 миллионга яқин мусулмон «экстремизмга қарши кураш» баҳонасида «қайта тарбиялаш лагерлари»да сақланаётгани аниқланган.
"Намойишга чиққанларни тарқатиш пайтида 21 нафар одам тартибни бузган деган айблов билан қўлга олинган. Улар милиция бўлимида уч соат ушлаб турилганидан сўнг ҳар бирига 3 минг сўм ( тахминан 43 доллар)дан жарима солиниб, қўйиб юборилган", деб ёзди Озодлик радиоси қирғиз хизмати.