Россияда тақиқланган “Ислом давлати” террор гуруҳи Магнитогорскдаги кўп қаватли уй ва маршрут таксисидаги портлашлар учун масъулиятни ўз зиммасига олди.
Террор гуруҳларининг интернетдаги фаолиятини кузатиб борувчи SITE Intelligence Groupнинг билдиришича¸ “Ислом давлати” портлашлардан уч ҳафта ўтиб бу баëнотни араб тилидаги Al Naba газетасида эълон қилган.
Айни пайтда¸ Россия Тергов қўмитаси портлашга газ ускунасидаги носозлик сабабчи бўлгани ҳамон асосий версия бўлиб қолаëтганини билдирди. Қўмита баëнотида¸ воқеа жойидан портловчи моддалар топилмагани айтилади.
31 декабрь куни Магнитогорскдаги 10 қаватли уйда рўй берган кучли портлаш оқибатида 39 одам нобуд бўлган эди.
Расмий баëнотга кўра¸ портлаш маиший газ ускунасидаги носозлик оқибатида юз берган.
1 январь куни Магнитогорскда маршрут таксиси портлаши оқибатида яна уч одам ўлган ва расмийлар бунга ҳам газ портлаши сабаб бўлганини билдирган эди.