Венесуэла парламенти раиси, қатор давлатлар томонидан вақтинчалик президент сифатида тан олинган Хуан Гуайдо аҳолини 23 февраль куни гуманитар ёрдам масаласида намойиш ўтказишга чақирди.
-23 февраль куни Венесуэланинг барча ҳудудларида, ҳарбий қисмларнинг ташқарисида Венесуэлага гуманитар ёрдамни киритиш талаби билан намойиш ўтказилади. Биз 23 февралда кўчаларга чиқамиз,- деди Гуайдо.
Бир неча ҳафтадан буён амалдаги президент Николас Мадурога содиқ қолаётган Венесуэла армияси Колумбиядан олиб келинаётган гуманитар ёрдамни чегарадан ўтказмаяпти.
Нефтга бой бўлган Венесуэлада бир неча йилдан бери қаҳатчилик ҳукм сурмоқда. 2018 йилда Венесуэлада иқтисодий вазият кескин ёмонлашди, бу ердаги инфляция даражаси йилига бир миллион фоизга етди. Мамлакатнинг кўпчилик шаҳарларида асосий маҳсулотлар етишмовчилиги кузатилмоқда. Милионлаб одамлар иш излаб Венесуэлани тарк этган.
Январь ойида Венесуэлада 2018 йилнинг якунида овозларни сохталаштириш эвазига иккинчи марта президентликда қолгани айтилаëтган Мадурога қарши оммавий норозилик намойишлари бошланиб кетган эди.
Бу намойишлар ортидан 23 январь куни Хуан Гуайдо ўзини вақтинча президент деб эълон қилди. Жаҳоннинг кўплаб етакчи давлатлари, жумладан, АҚШ ва ЕИ Гуайдо ҳокимиятни тан олди. Россия¸ Хитой ва Туркия Мадурони қўллаб қувватламоқда.