Россияда тергов изоляторида ушлаб турилган сармоя жамғармалари менежери, америкалик Майкл Калвига расман молиявий товламачилик айблови қўйилди. Бу ҳақда Калвининг адвокати Дмитрий Клеточкин билдирди.
Baring Vostok сармоя ширкати асосчиси Калви Россиядаги энг таниқли хорижлик сармоячиларидан биридир. Клеточкиннинг билдиришича, унинг мижозига қўйилган айбловлар 21 февраль куни эълон қилинган.
Калви мазкур жиноий ишга алоқадорликда гумонланган яна беш нафар шахс билан бирга 14 февраль куни қўлга олинган эди.
Сармоячининг қўлга олингани Россияда катта шов-шувга сабаб бўлди.
Россия матбуоти хабарларига кўра, омбудсмен Титов бош прокурор Юрий Чайкадан Калвининг қўлга олингани қанчалик қонунга мувофиқ эканлигини текширишни сўраган.
20 февраль куни парламент олдида йиллик нутқини сўзлаган президент Владимир Путин ҳалол ишлаган бизнесменлар тазйиққа учрамаслигини таъкидлади. Президент бу билан Калвини назарда тутганми-йўқлиги ҳозирча номаълум.