АҚШ президенти Дональд Трамп Шимолий Корея раҳбари Ким Чен Ин билан учрашиш учун 25 февраль куни Вьетнам пойтахти Ханойга учиб кетди.
27 ва 28 февраль куни ўтадиган учрашувда Шимолий Корея ядровий дастурини тўхтатиш масаласи муҳокама қилинади.
Трамп сафар арафасида Оқ Уйда губернаторлар билан ўтган учрашуви чоғида Ким Чен Ин билан яхши муносабатлар ўрнатилганини айтди:
-Қизиғи шундаки, Ким Чен Ин билан ўртамизда жуда яхши муносабат пайдо бўлди. Бу қандай самара беришини кўрамиз. Лекин бунга қадар Ким Чен Ин бу мамлакатда бирорта одам билан муносабатга эга бўлмаган эди,-деди Трамп.
АҚШ минтақадаги вазиятни беқарорлаштираётган ядровий дастуридан воз кечса, Шимолий Кореяга молиявий кўмак кўрсатишни ваъда қилмоқда.
Ким Чен Ин Вьетнамга зирҳланган поездда йўлга чиқди. У 26 февралда Ханойга етиб келиши кутилмоқда.
Бу 2018 йилдан бери Трамп ва Кимнинг иккинчи учрашуви бўлади.