Остона полицияси шаҳарни экс-президент Нурсултон Назарбоевнинг шарафига Нурсултон деб номлаш тўғрисидаги қарорга қарши чиққан 20 га яқин намойишчини қўлга олди.
Қозоғистонни 30 йил мобайнида бошқарган 79 яшар Назарбоев 19 март куни халққа қилган жонли телемурожаатида истеъфога чиққанини билдирган эди.
Остона мэрияси қаршисига тўпланган намойишчиларни тез орада полиция олиб кетган.
Ҳозирча намойишчиларга бирор айблов эълон қилинганми-йўқлиги номаълум.
20 март куни Қозоғистон парламенти мамлакат пойтахти номини ўзгартириш тўғрисидаги қонунни маъқуллади. Парламент палаталарининг қўшма мажлисида пойтахт номини ўзгартиришни ёқлаб Мажлиснинг (қуйи палата) 103 ва Сенатнинг (юқори палата) 43 депутати овоз берди.
Остона шаҳри номини Нурсултонга ўзгартиришни Қозоғистоннинг янги президенти Қосимжўмарт Тўқаев таклиф қилди. Тўқаев, шунингдек, барча шаҳар ва вилоят марказларининг асосий кўчаларига Назарбоев номини беришни таклиф қилди.