АҚШ президенти Дональд Трамп ва Республикачилар партиясининг Конгрессдаги кўплаб вакиллари махсус прокурор Роберт Мюллер 2016 йилги АҚШ президенти сайловига Россия аралашгани юзасидан ўтказган терговнинг хулосаларини олқишлаб, уларни президентнинг “тўлиқ реабилитацияси”, деб атади.
Махсус прокурор Роберт Мюллер ўтказган терговнинг хулосалари билан Коншрессга АҚШ бош прокурори Уильям Барр 24 март куни ҳисобот берди. Унда Россия билан ҳеч қандай келишув ёки ҳамкорлик бўлмагани қайд этилган.
АҚШ президенти матбуот котиби Сара Сандерс 24 мартни Америка учун “буюк кун”, деб атади. “Икки йилга чўзилган жазавадан сўнг президент ва унинг миллионлаб тарафдорлари оқланди”, деди Сандерс.
Бироқ Конгрессдаги демократлар фикрича, Мюллернинг ҳисоботи президентни унинг адолатли судловга тўсқинлик қилиш мусаласида реабилитация қилмайди. Демократлар ҳисоботдан узиндиларни эмас, балки тўла эълон қилишни талаб қилмоқда.
Махсус прокурор баёнотида қайд этилишича, Трамп ва унинг сайлов штаби ходимларининг жиноятни содир этганлигини исботловчи далиллар мавжуд эмас. Бироқ Мюллер президент ва унинг сайлов штабини оқламади, жумладан махсус прокурор Дональд Трамп тергов ишига халал беришга уриндими, деган саволга жавоб беришга қийналди.
Роберт Мюллернинг тергови 2017 йилда бошланган эди. Иш доирасида Дональд Трамп штабининг содиқ раҳбари Пол Манафорт молиявий қонунбузарлик ва рўйхатдан ўтмаган ҳолда лоббичилик билан шуғуллангани учун жазога тортилган эди.