Халқаро ташкилотлар Украинада президентлик сайлови демократик тамойиллар асосида ўтказилганини билдирмоқда.
Европа Кенгаши парламентлар ассамблеяси кузатувчилари овоз бериш жараёни тинч ўтгани ва яхши уюштирилганини, сайловчилар ўзлари истаган номзодга ҳеч қандай тўсиқларсиз овоз бериш имкониятига эга бўлганликларини таъкидлади.
НАТО парламент ассамблеяси эса сайловни «эркин одамларнинг эркин танлови» сифатида баҳолади.
-Мен бу сайлов эркин одамларнинг эркин танлови бўлганини кузатдим. Украиналиклар ўзларининг демократик тамойиллар ва Европа қадриятларига қатъий амал қилиш ниятида эканини намойиш этдилар, - деди НАТО парламиент ассамблеяси кузатувчиси Михал Шчерба.
Украинада 31 март куни бўлиб ўтган президент сайловида 39 номзод курашди.
Марказий сайлов комиссияси 1 апрель куни сайловнинг иккинчи босқичида қизиқчи Владимир Зеленский ва амалдаги президент Петро Порошенко иштирок этишинги билдирди. Зеленскийга сайловчиларнинг 30 фоизга яқини, Порошенкога эса 16 фоизга яқини овоз берган.
Украина президенти сайловининг иккинчи босқичи 21 апрелда бўлиб ўтади.