Ливия ҳукумат кучлари расмийси Муҳаммад Ғунуний 7 апрель куни мамлакат пойтахти Триполида ўтган матбуот анжуманида фельдмаршал Халиф Хафтарнинг исёнчи Миллий армиясига қарши ҳарбий амалиёт бошланганини эълон қилди.
-Ливия Қуролли кучлари мамлакат шаҳарларини агрессорлар ва ноқонуний қуролли гуруҳлардан озод қилиш учун “Ғазаб вулқони” деб номланган ҳарбий амалиёт бошланганини билдиради,- деди Ғунуний.
Хафтар қўмондонлигидаги армия халқаро ҳамжамият томонидан тан олинган Ливия ҳукуматини ағдариб, ҳокимиятга келиш мақсадида 7 апрель куни пойтахт Триполининг жанубий қисмига зарба берган эди. Хафтар кучлари ўтган ҳафтада Триполининг ғарбини эгаллаб олиш учун ҳарбий амалиётни бошлаган.
БМТ Ливия Миллий армияси раҳбари Халиф Хафтарни тан олинган ҳукумат билан муросага келишга чақирган. БМТ Хафвсизлик кенгаши Хафтарни Ливиядаги барқарорликни издан чиқараётгани тўғрисида огоҳлантирган.
Ливияда 2011 йилда президент Муаммар Каддафи халқ қўзғолони оқибатида президентликдан ағдарилганидан бери, турли гуруҳлдар ўртасида ҳокимият учун кураш тўхтамаяпти.