АҚШ Ливия пойтахти Триполи яқинидаги жангдан хавотирда эканлигини изҳор қилиб, ўзини “Ливия Миллий армияси” деб атовчи гуруҳ қўмондони Халифа Ҳафтарни шаҳарга ҳужумини зудлик билан тўхтатишга чақирди.
Ливиянинг БМТни қўллаб келаётган Миллий бирлик ҳукуматининг Соғлиқни сақлаш вазирлиги 7 апрель куни пойтахт шимолида Триполи ҳукумати ҳамда Ҳафтарнинг Россия дастаклаётган қўшинлари ўртасидаги жангларда 11 одам ҳалок бўлганини, 23 одам эса жароҳат олганини билдирди.
Вазирлик ҳалок бўлганлар оддий фуқаролар ёки ҳарбийлар эканлигини очиқламади.
7 апрель куни Ҳафтар бошқарувидаги кучлар Триполи аэропорти яқинида ҳаво ҳужумини амалга оширганини маълум қилди.
Хафтар қўмондонлигидаги армия халқаро ҳамжамият томонидан тан олинган Ливия ҳукуматини ағдариб, ҳокимиятга келиш мақсадида 7 апрель куни пойтахт Триполининг жанубий қисмига зарба берган эди. Хафтар кучлари ўтган ҳафтада Триполининг ғарбини эгаллаб олиш учун ҳарбий амалиётни бошлаган.
БМТ Ливия Миллий армияси раҳбари Халиф Хафтарни тан олинган ҳукумат билан муросага келишга чақирган. БМТ Хафвсизлик кенгаши Хафтарни Ливиядаги барқарорликни издан чиқараётгани тўғрисида огоҳлантирган.
Ливияда 2011 йилда президент Муаммар Каддафи халқ қўзғолони оқибатида президентликдан ағдарилганидан бери, турли гуруҳлдар ўртасида ҳокимият учун кураш тўхтамаяпти.