Эрон билан 2015 йилда ядровий шартномани имзолаган Европа давлатлари Вашингтон ва Теҳрон ўртасидаги вазият кескинлашаётганидан ташвишланмоқда. Европа Иттифоқи расмийлари ўз ташвишларини Брюсселга кутилмаган сафар билан келган АҚШ давлат котиби Майк Помпеога билдирдилар.
Британия, Франция, Германия ташқи ишлар вазирлари ва Европа Иттифоқининг ташқи ишлар мутасаддиси Федерика Могерини 13 май куни Майк Помпео билан ўтган йиғилишда Эрон билан ядровий шартномани сақлаб қолиш масаласини муҳокама қилди.
-Майк Помпео нафақат бизнинг, балки Европа Иттифоқига аъзо давлатлар вазирларининг нуқтаи назарини аниқ эшитди. Биз жуда нозик ва кескин вазиятни бошдан кечирмоқдамиз. Шунинг учун бу вазиятга масъулият билан ёндошмоғимиз, ҳарбий зиддиятнинг олдини олиш учун максимал даражада босиқ бўлишимиз лозим, - деди Федерика Могерини.
Аввалроқ АҚШ Эрон Форс кўрфазида ўз манфаатларига таҳдид солаётганини айтиб, кўрфазга учоқташир кемаларини юборган эди.
Ўтган ҳафтада Теҳрон ҳукумати халқаро келишувда ўз ядровий фаолиятига қўйилган чекловларга амал қилишни АҚШ янги санкцияларига чап бериш йўли топилгунга қадар тўхтатишини эълон қилди.
АҚШ ўтган йилда Эрон ва дунёнинг қудратли давлатлари ўртасида эришилган келишувдан чиқиб, Эронга қарши санкцияларни қайта жорий қила бошлаган. Аммо Европа давлатлари келишувни сақлаб қолишга курашиб келади.