Президент Дональд Трамп америкалик астронавтларни 2024 йилгача ойга яна қайта қўндириш лойиҳаси учун АҚШ коинот агентлиги - NASA га 1 миллиард 600 миллилон доллар қўшимча маблағ зарурлигини билдирди. АҚШ астронавтлари сўнгги марта ойга 1972 йилда туширилган эди.
Трамп Конгрессга NASAни молиялашни кўпайтириш таклифини 13 май куни Твиттер саҳифаси орқали эълон қилди.
«Менинг маъмуриятим даврида биз @NASA қудратини қайта тикламоқдамиз ва Ойга қайтамиз, ундан кейин эса Марсга қўнамиз», деб ёзди Трамп.
Аввалроқ NASA ойга астронавтларни қайта қўндириш лойиҳаси 2028 йилда амалга оширилиши кутилаётганини маълум қилганди. Мазкур лойиҳани амалга ошириш учун Коинот агентлиги 2024 йилда илк маротаба «Дарвоза» коинот станциясини ой орбитасига чиқаришни режалаштирганди.
Коинотни ўзлаштириш ўтган асрнинг 50-йилларидан бошланган эди ва бу соҳада Совет Иттифоқи билан АҚШ рақобатлашган. Бу икки давлат коинотни ўзлаштиришга киришган асосий давлатлар эди.
1961 йилнинг 12 апрелида Совет Иттифоқи биринчи марта коинотга одамни учирган. Юрий Гагарин инсоният тарихидаги биринчи космонавт бўлиб қолди.
1969 йилнинг 20 июлида эса АҚШ Апполон-11 коинот кемасини ойга учирди. Америкалик австронавтлар Нил Армстронг ва Базз Олдрин ойда қадам босган биринчи одам бўлди. Ўшандан бери АҚШ 6 марта ойга автронавтларини қўндирган.