Украиналиклар мамлакатнинг янги президенти Володимир Зеленский илк буйруғи билан тарқатиб юборган парламент - Олий Раданинг янги таркиби учун сайловда иштирок этмоқда.
Украина Марказий сайлов комиссияси 3 мингдан ортиқ мустақил номзод ва 22 сиёсий партиядан кўрсатилган 2 минг 700 дан ортиқ номзод рўйхатга олинганини билдирган.
Жами 450 депутатнинг ярми бир мандатли округлардан, ярми эса сиёсий партиялар берган рўйхат асосида сайланади.
Сайловни халқаро ташкилотларнинг қарийб 2 мингга яқин вакили кузатаётгани айтилди.
21 июль кунги сайлов, янги президент қарори билан, белгиланган муддатдан 3 ой аввал ўтказилмоқда.
Сайлов арафасида ўтказилган жамоатчилик сўровида иштирокчиларнинг аксарияти Зеленский фаолиятини қўллаб қувватлашини билдирган.
Шунингдек, сўровлардан кўринишича, янги таркибдаги парламентдан 5 ёки 6 партия, жумладан Зеленский етакчилигидаги "Халқ хизматкори" партияси, собиқ президент Петро Порошенко бошчилигидаги "Европача бирдамлик" партияси, собиқ бош вазир Юлия Тимошенко бошқарадиган "Батькившина" партияси ҳамда таниқли рок-қўшиқчи Святослав Вакарчук бошчилигидаги "Голос" партиялари номзодлари жой олиши мумкин.
Сайлов маҳаллий вақт билан эрталаб соат 8 да бошланди, кечки соат 8 га қадар давом этади. Расмий натижалар эса 22 июль куни маълум қилиниши кутилмоқда.