Тожикистон Миллий банкининг маълум қилишича, халқаро молия ташкилотлари, жумладан, Жаҳон банки Роғун ГЭСини барпо қилиш бўйича лойиҳани молиялаштирмаслиги мумкин.
Аввалроқ Тожикистон Миллий банки вакиллари халқаро молия ташкилотларидан бир қанчасига Роғун лойиҳасини молиялаштиришда иштирок этишни таклиф қилганди.
МБ раис ўринбосари Жамолиддин Нуралиев халқаро молия ташкилотлари кўпинча лойиҳаларни “нолдан” молиялаштиришини, Роғун ГЭСи эса ўзининг якуний босқичига етиб қолганини айтди.
Тожикистон Роғун ГЭСини қуриш учун асосан ўзининг ички имкониятларидан фойдаланмоқда. Молия вазирлиги маълумотига кўра, 2019 йили лойиҳа учун мамлакат бюджетидан 222 миллион доллар атрофида пул ажратилган.
Ҳозирги пайтда ГЭСда 6 агрегатдан 2 таси ўрнатилган. Сув тўлдирилганидан кейин ўрнатилган агрегатлар ишга туширилади. Биринчи агрегат 2018 йилнинг 16 ноябрида ўрнатилган эди.