Украина Марказий сайлов комиссияси 21 июль куни ўтказилган парламент сайловида берилган барча овозлар санаб бўлинганини маълум қилди. Комиссия президент Володимир Зеленскийнинг “Халқ хизматкори” партияси энг кўп овоз олганини тасдиқлади.
Комиссия сайтида эълон қилинган маълумотга кўра, Зеленский партиясига сайловчиларнинг 43,16 фоизи овоз берган.
Россияпараст “Ҳаёт учун” партияси 13,05 фоиз, собиқ бош вазир Юлия Тимошенконинг “Батькившчина” партияси 8,18 фоиз, собиқ президент Петро Порошенконинг “Европа билан бирдамлик” партияси эса 8,1 фоиз овоз олган.
Парламентдан ўрин олиш учун лозим бўлган 5 фоизлик тўсиқдан ўтган сўнгги партия қўшиқчи Святослав Вакарчукнинг “Голос” партияси бўлди (5,8 фоиз овоз).
Марказий комиссиянинг маълум қилишича, сайловда сайловчиларнинг 49,2 фоизи овоз берган.