Қирғизистонлик журналист Алишер Соиповнинг ўлими юзасидан 2013 йили тўхтатилган жиноят иши қайта тикланди. Бу ҳақда Озодлик радиоси қирғиз хизматига (“Азаттиқ” радиоси) марҳумнинг укаси Шоҳруҳ Соипов хабар қилди.
Соиповнинг айтишича, жиноят ишининг қайта тиклангани Қирғизистон Бош прокуратурасининг Сўз эркинлиги халқаро ассоциациясига (IFEX) йўллаган жавоб хатида айтилган.
Хатда Ўш вилоят прокуратураси жорий йилнинг 29 августида терговчининг ишни тўхтатиш тўғрисидаги қарорини бекор қилгани ва тергов давом этаётгани айтилган.
Азаттиқ” радиосига кўра, Бош прокуратура матбуот хизмати маълумот текширилаётганини хабар қилган.
Алишер Соипов 26 ёшида - 2007 йилнинг 24 октябрь куни Ўшдаги Масалиев кўчасида отиб кетилган. Журналистнинг қотиллари ҳалигача топилмаган.
Алишер Соипов Америка Овози, Озодлик, ВВС, Maшҳад радиолари, “Фарғона.Ру” ахборот агентлиги билан ҳамкорлик қилиб, Фарғона водийсидаги сиёсий, диний, хавфсизлик, инсон ҳуқуқлари мавзусидаги воқеаларни ёритиб келган.
25 ёшида у “Сиёсат” ҳафталик газетасини таъсис этган. Қирғизистон жанубида тарқатилган бу газетанинг Ўзбекистонда ҳам муштарийлари бор эди.
Таҳлилчилар Алишернинг ўлимини унинг касбий фаолияти билан боғлашади. Буюртма қотиллик изи қўшни Ўзбекистонга бориб тақалиши мумкинлигини Қирғизистон ҳуқуқ-тартибот идоралари ҳам рад этган эмас.