Қўшма Штатлар америкалик ҳарбийларнинг бир қисмини жангарилар ҳужумига ҳадаф бўлиши мумкин бўлган нефть конларини қўриқлаш учун Сурияда қолдириш режасини муҳокама қилмоқда. Бу ҳақда АҚШ мудофаа вазири Марк Эспер маълум қилди.
Вазирга кўра, режа ишлаб чиқиш босқичида бўлиб, ҳали президент Трампга тақдим этилганича йўқ. АҚШ президентининг ўзи душанба куни Суриядан америкалик ҳарбийларнинг ҳаммасини олиб чиқиб кетишни исташини билдирганди. Айни пайтда у “нефть хавфсизлигини таъминлаш зарур”лиги ҳамда Суриянинг бошқа қисмидан АҚШ аскарларини олиб чиқиб кетмаслик хусусида Исроил ва Иордания илтимосига эътибор қаратиш лозимлигини ҳам қўшимча қилган.
АҚШ президенти Дональд Трамп икки ҳафта муқаддам Туркия президенти Ражаб Тоййиб Эрдўғон билан сўзлашувдан кейин америкалик ҳарбийларни Сурия шимолидан олиб чиқиб кетиш ҳақида буйруқ берганди. Бу топшириқдан бир кун ўтиб Анқара Суриянинг қуролли курд отрядлари назорати остида бўлган ҳудудида ҳарбий амалиёт бошлаган.
Трампга кўра, у турк армияси ҳужумига ҳадаф бўлиши мумкин мавқеларни эгаллаган америкалик аскарларнинг ҳаётини хавф остига қўйишни истамаган.
АҚШнинг Суриядаги мингга яқин аскарини Ироққа кўчириш қарори олинган. Қайд этилишича, америкалик аскарлар ҳали тўлиғича Суриядан олиб чиқиб кетилган эмас. Айрим маълумотларга кўра, бу эвакуациянинг Сурия жанубида (Исроил билан чегарада) жойлашган америкалик ҳарбийларга дахли бўлмайди.