Пентагон Суриянинг шимолий-шарқидаги нефть конлари қайта жонланаётган “Ислом давлати” жангарилари қўлига ўтиб кетмаслиги учун у ердаги ҳарбий ҳозирлигини кучайтириш ниятида эканигаоид баёнот тарқатди.
Аввалроқ президент Дональд Трамп Анқарага Туркия билан Сурия чегараси бўйлаб курд отрядларидан ҳоли “хавфсиз ҳудуд” барпо этиш имкониятини яратиш учун АҚШ қўшинлари Суриядан олиб чиқиб кетилишини эълон қилганди.
AFP агентлиги мухбири аввалроқ Россия байроқлари ўрнатилган қўриқчи машиналари Суриянинг Қамишли шаҳридан ғарбга йўл олганини кўргани ҳақида хабар берган.
Трампнинг қўшинларни Суриядан олиб чиқиб кетиш қарори Конгрессдаги демократларнинг ҳам, республикачиларнинг ҳам кескин танқидига учради. Улар “Сурия демократик кучлари” (курд отрядлари) қамоқхоналарида бўлган 10 минг чоғли ИД жангариси талотумда қамоқдан қочиши мумкинлиги юзасидан хавотир изҳор қилганлар.
“АҚШ ва ҳамкорларининг “Ислом давлати”га қарши курашда эришган энг аҳамиятли муваффақиятларидан бири Шарқий Суриядаги ИДнинг муҳим даромад манбаи бўлган нефть конлари устидан назорат ўрнатиш бўлганди”, дейилади АҚШ Мудофаа вазирлиги баёнотида.
Баёнотда нефть конларининг ИД ёки бошқа “беқарорлаштирувчи субъектлар” қўлига ўтиб кетишига йўл қўймаслик учун АҚШ “Сурия демократик кучлари”даги ҳамкорлари билан биргаликда ўз позициясини мустаҳкамлаш ниятида экани урғуланади.