Россия президенти Владимир Путин 19 декабрда ўтказган йиллик матбуот анжуманида глобал иқлим исиши ҳамда россиялик спортчиларнинг Олимпиада ўйинларидан четлатилганига тўхталиб ўтди.
Путин маҳаллий ва хориждан келган журналистлар саволларига жавоб берар экан, Россияда ўртача ҳарорат глобал кўрсаткичдан икки баробар тезроқ суръатда кўтарилаётганини таъкидлади.
Президент глобал миқёсда ўртача ҳароратнинг кўтарилаётгани Россиянинг Арктика ҳудудида жойлашган шаҳарларига таҳдид солишини айтди. Путин Россия глобал иқлим исиши суръатини секинлатишни кўзловчи Париж битими шартларига амал қилаётганини қўшимча қилди.
Путин россиялик спортчилар тўрт йилга Олимпиада ва бошқа спорт мусобақаларидан четлатилгани масаласида эса, Бутунжаҳон антидопинг ташкилоти (WADA) одил қарор чиқармаганини таъкидлади. Хусусан, президент барча спортчи эмас, балки қоидани бузган шахслар алоҳида жазоланиши кераклигини айтди.
19 декабрда ўтказилган йиллик анжуман Путиннинг 15-йирик матбуот конференциясидир. Ҳафта бошида Кремль анжуманда иштирок этиш учун рекорд 1895 нафар журналистга аккредитация берилганини маълум қилган эди.
Путин ҳар йили ўтказадиган катта матбуот анжуманида ўз имижини яхшилашга уриниб, Россияликлар ишончли қўлларда эканлигини айтиб келади.