Россияда ўтган бир кеча-кундузда коронавирус инфекциясидан 150 одам вафот этди. Бу эпидемия бошланганидан бери бир сутка ичида кузатилган энг кўп ўлим ҳолатидир, дея хабар қилди Озодликнинг рус хизмати.
Расмий маълумотларга кўра, COVID-19 вируси қурбонларининг умумий сони 3249 нафарга, коронавирусга чалинганларнинг умумий сони эса 326 минг 448 нафарга етган. Айни пайтда қарийб 100 минг чоғли бемор соғайиб кетган.
Коронавирус инфекциясини юқтириб олиш билан энг кўп ҳолат ҳали-ҳамон пойтахт Москвада қайд этилмоқда.
Вирус ёйилиши билан боғлиқ равишда карантин чоралари Россияда март ойи охирида киритилган. 11 май куни президент Владимир Путин минтақалар ўзини ўзи иҳота қилиш тартибини юмшатиш бўйича қарор қабул қила бошлаши мумкинлигини билдирган. Москвада мазкур тартиб муддати 31 майгача узайтирилган.