Британия бош вазири Борис Жонсон Лондондаги ирқчиликка қарши тинч намойишлардан полиция билан тўқнашувга киришган “ярамаслар” фойдаланиб қолди, дея билдирди.Бунинг натижасида, бош вазирга кўра, намойишлар “қайси мақсадда уюштирилгани бўлса, ўша мақсадга нисбатан хиёнат бўлиб қолган”. Жонсон тартибсизликлар учун айбдор бўлганлар жавобгарликка тортилишини ваъда қилди.
Лондон полициясига кўра, намойишчилар билан шанба ва якшанба кунлари бўлиб ўтган тўқнашувларда 27 нафар полициячи жароҳатланган. Икки полициячи, шу жумладан, отдан йиқилган аёл оғир тан жароҳати олган.
Бош вазир қароргоҳи олдида содир бўлган тўқнашувларда унча кўп намойишчи қатнашган эмас. Намойишнинг катта қисми Лондон марказида бўлиб ўтиб, ўн минглаб одам иштирок этган бу акциялар тинч ўтган.
Ижтимоий тармоқларда парламент биноси олдидаги бош вазир Уинстон Черчилл ҳайкалига нисбатан қилинган вандализм ҳаракати ҳақида баҳс авж олди. Ҳайкал тагсупасида “У ирқчи эди” ёзуви пайдо бўлган. Парламент депутатлари дохил кўпчилик Черчиллнинг нацизмга қарши курашдаги хизматларини эсга олиб, бу ҳаракатни қоралади.
Бошқалар эса собиқ бош вазир ҳақиқатан ирқчилик қарашларига эга бўлгани ва колонизаторлик сиёсатини (хусусан, Ҳиндистонда) олиб борганини иддао қилмоқда. Англия жанубий-ғарбидаги Бристолда қулфурушлик билан шуғулланган тадбиркор ва филантроп Эдвард Колстон ҳайкалининг намойишчилар томонидан қўпориб ташлангани ҳам мунозараларга сабаб бўлди.
Полиция томонидан қўлга олинган Жорж Флойд ўлимидан кейин BlackLivesMatter шиори остида ирқчиликка қарши АҚШда бошланган акциялар Европанинг қатор мамлакатларига ҳам кузатилди. Аксар ҳолларда бу намойишлар тинч ўтди. Брюсселда эса намойишчиларнинг кичик қисми дўкон ойналарини синдира бошлаганидан кейин полиция билан тўқнашув рўй берди.
Намойишлар Рим, Копенгаген, Мадрид, Стокгольм ва Будапешт шаҳарларида бўлиб ўтди.
АҚШнинг ўзида норозилик намойишлари ҳамон давом этмоқда. Аммо сўнгги кунларда зўравонлик даражаси сезиларли даражада пасайгани айтилмоқда.