Ички ишлар вазирлиги 1 апрелда тарқатган маълумотга кўра, Шаирбек Ташиев “Қирғизнефтегаз” корхонасидаги катта маблағни талон-торож қилиш ҳолатлари бўйича қўзғатилган жиноят иши доирасида ҳибсга олинган. Терговни бошлашга Давлат солиқ хизмати материаллари ҳамда аудиторлик текшируви натижалари асос бўлган.
"Тергов жараёнида нефт ўртамчи компаниялар орқали берилиб, кейинчалик “Қирғиз Петролеум Компани” давлат корхонасига қайта сотилгани ва шу йўл билан ноқонуний даромад олингани аниқланди. Дастлабки ҳисоб-китобларга кўра, давлатга етказилган зарар 4,1 миллиард сомдан ошади (тахминан 46 миллион доллар атрофида - таҳририят). Тергов ишлари давом этмоқда, давлатга етказилган зарар тўлиқ ҳажмда Шаирбек Ташиев томонидан қопланиши керак" - деп айтилади Ички ишлар вазирлиги баёнотида.
Аввалроқ “Қирғизнефтегаз”даги қонунбузарликлар иши бўйича бир нечта шахс, жумладан Ташиевларнинг жияни ҳам қўлга олинган эди. У “Қирғизнефтегаз” билан боғлиқ компанияга раҳбарлик қилган.
Шаирбек Ташиев Қирғизистон парламенти - Жогорку Кенешнинг ҳозирги чақирилишига кўп овоз билан сайланган депутатлардан бири эди. Бироқ акаси лавозимидан кетгани ва “Қирғизнефтегаз” иши бўйича тергов бошланганидан кейин у депутатлик мандатидан воз кечган.
Шунингдек, Камчибек Ташиевга яқин деб ҳисобланган яна ўнтача депутат мандатларини топширган. Улардан бири - Қундузбек Сулайманов ҳам 1 апрел куни қўлга олингани расмий маълум қилинди. У “мансаб ваколатларидан фойдаланиб, айрим хусусий компаниянинг манфаатларини лобби қилиш орқали унга қўллаб-қувватлаш ташкил этган” деб шубҳа қилинмоқда.
“Қирғизнефтегаз” мамлакатдаги йирик давлат компанияларидан бири бўлиб, нефть қазиб олиш, қайта ишлаш ва нефть маҳсулотларини сотиш билан шуғулланади.
Сўнгги ҳафталарда корхона атрофида муҳокама кучайди. Бунга коррупцион схемалар ва молиявий қонунбузарликлар ҳақидаги журналистик суриштирувлар сабаб бўлган. Илгари ҳам журналистлар корхонадаги қонунбузарликлар ва Камчибек Ташиевга яқин шахслар эҳтимолий алоқадорлиги ҳақида хабар берган, аммо ҳокимият бу материалларга муносабат билдирмаган. Ташиев лавозимидан кетгани ва тергов бошланганидан кейин Қирғизистон Давлат солиқ хизмати раҳбари аввал текширув ўтказиш имкони бўлмаганини, чунки корхона Миллий хавфсизлик давлат қўмитаси назоратида бўлганини айтган.
Камчибек Ташиевнинг ўғли Тай-Мурас Ташиев эса Давлат солиқ хизмати суриштирувида номи тилга олинган компаниялардан бирининг таъсисчиси сифатида кўрсатилган. У қонунбузарликларга алоқадорлигини рад этмоқда.
Шаирбек Ташиев февралда журналистларга берган интервьюда қонун бузмаганини, терговга чақирса, жавоб беришга тайёрлигини айтган.
Қамчибек Ташиев узоқ йиллар давомида президент Садир Жапаровнинг яқин сиёсий ҳамкори бўлиб келган. У 2020 йилги ҳокимият алмашинувида Жапаровни қўллаб-қувватлаган ва Миллий хавфсизлик қўмитасини беш йилдан ортиқ бошқарган. Президент Жапаров Ташиевни ишдан олиш қарорини “давлат ва халқ тинчлиги учун” қабул қилинганини айтган.
Қамчибек Ташиев ўзи икки ҳафта аввал Ички ишлар вазирлигига чақирилган. Ўшанда у терговда гувоҳ сифатида иштирок этаётгани айтилган.
Қамчибек Ташиев ҳозирча укасининг қўлга олиниши юзасидан муносабат билдирмади. Аммо 20 март куни Бишкекдаги масжидлардан бирида ҳайит намозини адо этгач, у ҳалқдан кечирим сўраган ва ўзи ҳам барчани кечирганини айтган. Лекин бу одатий диний анъанага боғлиқ кечирим сўрашми ёки сўнгги сиёсий воқеалар билан боғлиқми, аниқ маълумот берилмаган.