Эпштейннинг ўзбекистонлик қурбони деб қаралаётган аёл Конгрессдаги эшитувда у уй қамоғи пайтида уч йил давомида зўрлаганини айтди. Роза исмли ўзбекистонлик аёл ўсмирлик даврида Эпштейннинг ҳамкори ва модел агенти Жан-Люк Брюнел томонидан ёлланган бўлиб, АҚШ Вакиллар палатаси демократлари томонидан ташкил этилган жойлардаги тингловда бир қатор жабрланганлар билан бирга илк бор омма олдида гапирди.
Ўзбекистонлик аёл Жеффри Эпштейн уни уй қамоғида бўлган вақтида жинсий зўрлаганини иддао қилмоқда.
Флоридада ўтган Конгресс тингловида “Роза” деб таништирилган аёл илк бор бу ҳақда омма олдида гапирди.
Унинг айтишича, модел агент Жан-Люк Брюнел ўсмирлик пайтида, 2008 йилда уни Америкада муваффақиятли карьера ваъдаси билан ёлланган.
Аммо ўзбекистонлик қиз гувоҳлигига кўра, бу ваъдалар йиллар давом этган зўравонликка айланган.
Роза 2009 йилда Эпштейн билан Палм-Бичдаги уйида танишганини айтди. Ўша вақтда Эпштейн баҳсли суд келишувидан кейин уй қамоғида эди.
“АҚШга келганимга бир ой ҳам тўлмасдан туриб, мени жинсий жиноятчи уйига юборишди. У қамоқхона камерасида бўлиши керак эди, лекин мен у билан бу ерда, Вест-Палм-Бичдаги уйида учрашдим. У қамоқда эмас эди”, деди Роза.
Унинг сўзларига кўра, жинсий зўрлашлар уч йил давом этган.
“Бир куни мени унинг массажчиси хонасига олиб борди…ва ўша куни Жеффри мени биринчи марта зўрлади. Кам таъминланган муҳитдан келганим сабабли, мен зўрланиш учун идеал нишон эдим".
“Роза” — унинг ҳақиқий исми эмас, бу унинг шахсини ҳимоя қилиш учун ишлатилган псевдоним. У ҳақида тўлиқ маълумот оммага очиқ эълон қилинмаган.
“Roza”нинг исми биринчи марта Эпштейн ишидан жабрланганлардан бири сифатида АҚШ Адлия вазирлиги томонидан эълон қилинган 3 миллион саҳифалик таҳрирланмаган Эпштейн ҳужжатларида ошкор бўлган.
Конгресснинг демократлар партиясидан бўлган аъзолари Флорида штатидаги Вест-Палм-Бич шаҳрида 12 май куни норасмий тинглов ўтказди.
Қонунчиларнинг айтишича, бу тинглов Эпштейн ва унинг шериклари йиллар давомида қандай қилиб жавобгарликдан қочиб келганини очиб бериш учун ташкил қилинган.
Тингловга Роберт Гарсия ва Мелания Стфнсбери каби демократлар партиясидан бўлган қонунчилар раҳбарлик қилди.
Роза яқинда эълон қилинган суд ҳужжатларида унинг шахси ошкор бўлиши ортидан руҳий босимга тушганини айтди.
“Энди мен доим ортимга қараб яшашга мажбурман.”, дея йиғи аралаш гапирди Роза.
Жеффри Эпштейн америкалик молиячи бўлиб, 2008 йилда вояга етмаган шахсни фоҳишаликка жалб қилиш иши бўйича айбини тан олган ва баҳсли келишув доирасида енгилроқ жазо олган. Шу қарордан кейин у жинсий жиноятчи сифатида рўйхатга олинган.
2019 йил ёзида у АҚШда қайта ҳибсга олинган. Унга вояга етмаган қизларни, жумладан 14 ёшли қизларни ҳам қамраб олган жинсий эксплуатация ва одам савдоси айбловлари қўйилган. Терговга кўра, у йиллар давомида қизларни жалб қилиш ва уларни эксплуатация қилиш тармоғини ташкил этган.
2019 йил 10 август куни Эпштейн федерал жинсий савдо айбловлари бўйича судни кутаётган пайтда қамоқхонада вафот этган.
Расман унинг ўлими ўз жонига қасд қилиш деб баҳоланган, аммо бу ҳолат жамоатчиликда кўплаб савол ва баҳсларни келтириб чиқарган.
Унинг яқин ҳамкори Гислейн Максвелл вояга етмаганларни жинсий эксплуатация мақсадида одам савдосига ёрдам берганликда айбланиб, суд томонидан айбдор деб топилган. 2022 йилда у 20 йиллик қамоқ жазосига ҳукм қилинган.
Жеффри Эпштейн билан кўплаб нуфузли шахслар — сиёсатчилар, бизнесменлар, машҳурлар ва элита вакиллари таниш ёки у билан алоқада бўлган.
Очиқланган суд ҳужжатлари ва ёзишмаларда унинг турли одамлар билан мулоқотлари қайд этилган. Бироқ Эпштейн билан таниш бўлишлик ёки ёзишмаларнинг мавжудлиги автоматик равишда у ёки бу шахснинг жиноятда иштирок этишни англатмайди.