Эрон ташқи ишлар вазири Аббос Арақчи Ташқи ишлар вазирлиги зарурат бўлса ҳам музокара олиб боришга, ҳам жанг қилишга тайёр эканини билдирди.
- Биз ўз вазифамизни бошқаларнинг вазифасидан алоҳида деб ҳисобламаймиз. Қаерда курашиш керак бўлса — курашамиз, қаерда музокара қилиш керак бўлса — музокара қиламиз. Давлат ҳар бир шахсга қандай вазифа юклаган бўлса, бизга ҳам шу вазифани юклаган. Давлатнинг умумий мақсадлари билан тўлиқ уйғунликда ишлаш — бизнинг вазифамиз. Агар давлат манфаатлари дипломатия, муҳокама ва музокара соҳасида тайёргарлик кўришни талаб қилса, биз бунга тайёр бўламиз. Лекин бу Қуролли Кучлар мамлакат мудофааси учун қандай куч билан тайёргарлик кўрса, худди шу куч билан амалга оширилади, деди Эрон ташқи ишлар вазири Аббос Арақчи.
У бу сўзларни марҳум собиқ ташқи ишлар вазирлари Камол Харрозий ва Ҳусайн Амир‑Абдуллоҳиён хотирасига бағишланган маросимда айтди ва Эрон ТИВ дипломатик саъй‑ҳаракатлари ҳарбий қўмондонлар билан яқин мувофиқлашувда олиб борилишини таъкидлади.
Арақчининг баёнотлари АҚШ президенти Дональд Трамп музокаралар якуний босқичда эканини айтган, бироқ Эрон келишувга рози бўлмаса, янги ҳужумлар билан огоҳлантирган бир пайтда янгради.
АҚШ президенти Дональд Трамп Эрон билан можарони тугатишга “шошилмаётганини” ва Эрондан “тўғри жавоблар” олиш учун яна бир неча кун кутишга тайёр эканини билдирди.
- Иш жуда нозик чегарада турибди. Агар биз тўғри жавобларни олмасак, ҳаммаси жуда тез кечади. Биз тўлиқ тайёрмиз. Бизга мутлақо 100 фоиз тўғри жавоблар керак. Агар шундай бўлса, биз жуда кўп вақт, куч ва энг муҳими — инсонлар ҳаётини сақлаб қоламиз. Бу бир неча кун ҳам бўлиши мумкин, жуда тез ҳам кечиши мумкин. Эрон мағлуб бўлган давлат. Биз ҳозир баъзи одамлар билан ишлаяпмиз — айтишим керакки, улар жуда яхши одамлар билан. Улар ақлли, салоҳиятли, ва биз бундан жуда катта таассурот олдик. Умид қиламанки, айнан шу одамлар ҳамма учун фойдали бўлган келишувга эришади. Лекин билмайман. Агар бир неча кун кутиш орқали урушнинг олдини олиб, одамларнинг ўлимини тўхтатиш мумкин бўлса — бу жуда яхши иш, деб ҳисоблайман, деди АҚШ президенти.
Президент Эрон билан тинчлик келишувини якунлашга шошилмаётганини яна бир бор таъкидлаб, Ҳормуз бўғозини қайта очишгагина қаратилган чекланган келишувни кўриб чиқмаслигини билдирди.
“Биз бунга бир марта имконият берамиз”, — деди Трамп ва эҳтимолий келишув ҳақида гапирар экан қисман муросага бориш вариантларини рад этди.
Трамп Эрон масаласида Исроил бош вазири Беньямин Нетаньяху билан ҳамфикр эканини айтиб, Нетаньяху “мен хоҳлаган ишни қилади”, деди.
Axios нашри хабар беришича, икки раҳбар сешанба куни телефон орқали суҳбат ўтказиб, Эрон билан келишувга эришишга қаратилган янги уринишни муҳокама қилган.
Хабарга кўра, Трамп Нетаньяхуга воситачилар АҚШ ва Эрон имзолайдиган “ниятлар мактуби” лойиҳасини тайёрлаётганини айтган.
Бу ҳужжат имзолангандан сўнг, Эрон ядровий дастури ва Ҳормуз бўғози масалаларини қамраб олувчи 30 кунлик янги музокаралар раунди бошланиши режалаштирилган.
Хабарга кўра, Исроил бош вазири Биньямин Нетаньяху музокараларга нисбатан жуда шубҳа билан қарайди ва Эроннинг ҳарбий имкониятларини янада заифлаштириш ҳамда унинг асосий инфратузилмаларини йўқ қилиш мақсадида урушни қайта бошлашни истамоқда.
Исроил Мудофаа кучлари Бош штаби раҳбари Эяль Замир Исроил армияси ҳозирда “энг юқори тайёргарлик ҳолатида” эканини, ҳар қандай эҳтимолий ривожланишга тайёр туришини ва амалиётларни давом эттиришини айтди.
Шу билан бирга, 19 май куни Исроилнинг Тель‑Авив шаҳри яқинида жойлашган Бен‑Гурион халқаро аэропорти учиш‑қўниш йўлагида АҚШга тегишли ёқилғи қуйувчи ҳарбий самолётлар сони кўп экани кузатилди. Бу ҳарбий самолётлар у ерда қанча вақтдан бери тургани аниқ эмас.
Исроилнинг Kan TV телеканали АҚШ хавфсизлик расмийсига таяниб хабар беришича, АҚШ ва Исроил Эронга қарши ҳарбий амалиётларни қайта бошлаш эҳтимолига тайёргарлик ишларини якунлаган.