Исроил армияси сўнгги 24 соат ичида Тир, Набатия ва Бақаа водийси ҳудудларида “Ҳизбуллоҳ”га тегишли 150 дан ортиқ нишонларга зарба берганини маълум қилди.
“Ҳизбуллоҳ” ҳам жангари гуруҳ, ҳам Ливан жанубининг катта қисмини назорат қилувчи сиёсий партиядир. Қўшма Штатлар уни террорчилик ташкилоти деб ҳисоблайди, Европа Иттифоқи эса фақат унинг қуролли қанотини “қора рўйхат”га киритган.
Ливан Соғлиқни сақлаш вазирлиги маълумотига кўра, жанубий Ливандаги ҳужумларда камида 31 киши ҳалок бўлган ва 40 киши жароҳатланган.
Шунингдек Исроил армияси пайшанба куни жанубий Ливаннинг Тир шаҳри атрофида “Ҳизбуллоҳ” инфратузилмасига қарши янги зарбалар бошлаганини маълум қилди. Бу ҳужумдан олдин аҳолига эвакуация ҳақида огоҳлантириш берилган.
Аввалги куни Исроил Ливандаги Захрани дарёсидан жанубда жойлашган тахминан 40 километр атрофидаги ҳудудни “жанговар зона” деб эълон қилиб, аҳолини ҳужумлар олдидан чиқиб кетишга чақирган эди.
- Улар нима қилмасин, бу шаҳарни тиз чўктиролмайди. Улар биноларни вайрон қиляпти, шаҳидлар бор, аммо улар ер остидан яна чиқиб, шаҳарни қайта тиклайди. У яна Ортана денгизнинг келини бўлади. Биз бу ерда қоламиз, кетмаймиз. Бу бизнинг мамлакатимиз, еримиз, ҳаётимиз ва тирикчилигимиз. Улар фақат нафрат ва заҳар тарқата олади, чунки чегара яқинида катта йўқотишларга учраяпти. Шунинг учун барча ғазабини шу шаҳардан чиқармоқда, дейди Тир шаҳри турғуни Ғазвон Халаваний.
Бу кенг кўламли огоҳлантириш — 17 апрелдаги ўт очишни тўхтатиш келишувидан буён биринчи марта амалга оширилди. Шу вақтда кўплаб ливанликлар Қурбон ҳайитини нишонлаётган эди.
Пайшанба куни Ливан давлат ахборот агентлиги хабар беришича, Исроил икки марта зарба бериб, шаҳардаги бинони нишонга олган ва ёнғин келиб чиққан.
- Биз ухлаб ётган эдик. Ярим кечаси соат иккиларда жуда кучли зарба овозидан уйғониб кетдик. Атрофга қарасак, устимизга вайрона тушган — зарба бизга яқин жойга берилган ва бевосита бизнинг томонга қараган эди. Онам бу ерда ухлаётган эди; мана бундай катта тош унинг олдига тушган, яна бу ерга тушган, бу ерда эса менинг ўғлим бор эди. Ойна синди, у ердаги барча шишалар чилпарчин бўлди. Кўриб турибсиз, бутун уй зарар кўрган. Деворлар тутундан қорайиб кетди. Худога шукур, ҳеч ким жароҳат олмади, дейди Сайда шаҳри турғуни Тагрида Рамазон.
Бу ҳафта Исроил Ливандаги операцияларни кучайтиришини ва қуруқликдаги ҳаракатларни кенгайтирганини маълум қилди.
“Ҳизбуллоҳ” эса ўз жангчилари жанубда Исроил томонидан белгиланган “сариқ чизиқ”дан ташқарида Исроил кучлари билан тўқнашганини айтди.
Исроил армияси бошлиғи, генерал-лейтенант Эял Замир “Биз ‘Ҳизбуллоҳ’ ташкилотига янада қаттиқ зарбалар бериш учун операцияларни кучайтирмоқдамиз,” деди.
Жума куни Пентагонда Ливан ва Исроил ҳарбий делегациялари ўртасида музокаралар ўтказилиши кутилмоқда.
Келаси ҳафта жанговар ҳаракатларни тўхтатишга қаратилган янги тўғридан-тўғри музокаралар бошланиши режалаштирилган.
Жума куни ўтадиган учрашувда 6 нафар ливанлик офицердан иборат делегация иштирок этади. Делегацияга армия операциялари директори Жорж Ризқаллаҳ раҳбарлик қилади.