Украинанинг дрон ва ракета ишлаб чиқарувчиси Fire Point компанияси Фрейжа ракета мудофааси лойиҳаси учун радарлар, бошқарув тизимлари ва бошқа жиҳозларни етказиб бериш бўйича Европанинг ўндан ортиқ мудофаа компанияси билан келишувларга эришди ва ҳозирда турли тизимларни интеграция қилишни бошлаган. Бу ҳақда компания бош директори маълум қилди.
Украина Россиянинг баллистик ракета ҳужумларини тўхтата оладиган қурол яратиш учун шерикларни шошилинч тарзда қидираётган эди.
Умумевропа лойиҳаси ўтган ой Парижда 10 та ҳукумат ва 12 та мудофаа компанияси, жумладан Eurosam, Leonardo, Thales ва SAAB иштирокида расман ишга туширилди.
Ҳозирда Киев товуш тезлигидан бир неча баравар тез учувчи баллистик ракеталарни уриб тушириш учун АҚШда ишлаб чиқарилган Patriot тизимига таянади.
Бироқ Эрон билан боғлиқ уруш оқибатида янада кучайган ракета тутқичлар танқислиги Украина ҳимоясида заифликларни келтириб чиқарди.
Fire Point биринчи муваффақиятли тутиш амалиётини 2027 йил ўртасигача амалга оширишни режалаштирмоқда.
- Бунинг энг мураккаб жиҳати шундаки, биз одатда 20 ёки 30 йил давом этадиган дастурни бор-йўғи бир неча йил ичида амалга оширишга ҳаракат қиляпмиз. Бошқа томондан, бизда курашиш ва ишлаш истаги жуда юқори бўлган тажрибали иштирокчилар бор. Шунингдек, эҳтимол, улар бу бозор ва бу тизим қандай ишлашини қайта кўриб чиқишга ҳам тайёр, деди Fire Point бош директори Ирина Терех.
Украина компанияси ракета тутқичи сифатида ўзининг FP7 баллистик ракетасининг тезроқ версияси бўлган FP7.X моделини тақдим этмоқда ва ҳозирда уни нишонга йўналтирувчи тизим билан интеграция қилмоқда.
Саноат нашрлари Германиянинг Diehl Defence компанияси мазкур йўналтирувчи тизимни етказиб беришини хабар қилган.
Diehl вакили компания Fire Point билан музокаралар олиб бораётганини тасдиқлади, аммо тафсилотларни муҳокама қилишдан бош тортди.
Терехнинг айтишича, Fire Point бир дона баллистик ракета тутқични 1 миллион евродан камроқ қийматда ишлаб чиқаришни мақсад қилган.
- Биз украиналиклар танловимиз кўп эмаслигини тушунамиз. Чунки ҳаммамиз Patriot ҳаво ҳужумидан мудофаа ракеталари билан боғлиқ вазиятни, уларнинг ишлаб чиқариш суръатларини ва Украинада қанча миқдорда мавжудлигини кўриб турибмиз. Россия ҳужумлари кучаймоқда ва буни имконимиз борича тезроқ амалга ошириш шахсий манфаатимиздир. Албатта, биз сеҳргар эмасмиз ва физика қонунларини енгиб ўта олмаймиз, аммо қўлимиздан келганча барча билимларимиз ва тезлаштириш амалиётларимиздан фойдаланиб, келаси йили биринчи тажрибани амалга оширишга ҳаракат қиламиз, деди Fire Point бош директори Ирина Терех.
Украина мансабдорларининг айтишича, лойиҳа очиқ архитектура тамойили асосида қурилади ва унда турли компонентларни алмаштириш мумкин бўлади. Масалан, Weibel радари ўрнига Saab радари қўлланилиши мумкин.
Терехнинг сўзларига кўра, иштирокчи компаниялар минимал ишчи маҳсулот даражасига эришилгунча тадқиқот ва ишланмаларни молиялаштиради.
Норвегия Мудофаа тадқиқотлари институти ракета бўйича эксперти Фабиан Хоффманнинг таъкидлашича, кетма-кет олтита хатолик эҳтимолини 5 фоиздан паст сақлаш учун ҳар бир ушлаб қолувчи ракета тахминан 40 фоиз ҳолатда нишонга тегиши керак.
Хоффманнинг айтишича, агар бундай тизимни ҳақиқатдан ҳам 1 миллион евро қийматида яратиш мумкин бўлса, бу «жуда таъсирли» ва «жуда арзон» натижа бўлади.
FP7 ракетасининг ердаги нишонларга зарба бериш учун қўлланиладиган ҳужумчи версияси ҳам мавжуд. Бу версия тахминан 15 марта синовдан ўтказилган ва ҳозирда Украина Мудофаа вазирлиги томонидан сертификатлаш жараёнидан ўтмоқда.
Fire Point ушбу версияни жангда биринчи марта куз бошида қўллашни, анча йирик FP9 баллистик ракетасини эса куз охирида ишга туширишни режалаштирмоқда. Компаниянинг таъкидлашича, бу ракета Москвагача етиб бориши мумкин бўлади.