Россия халқ артисти Алла Пугачёва 18 сентябрь куни ижтимоий тармоқдаги саҳифаларида ўзини "хориж агентлари" рўйхатига киритиш илтимоси билан Адлия вазирлигига мурожаат қилди. Пугачёва бу билан илк маротаба Россиянинг Украинага бостириб киришига ўз муносабатини билдирди ва ўз фикри эри Максим Галкин фикри билан уйғун эканини эътироф этди.
"Мен софдил, виждонли ва самимий инсон, Россиянинг сотилмайдиган ва ҳақиқий ватанпарвари бўлган, ватанига фақат фаровонлик, тинчлик, сўз эркинлигини тилайдиган эрим билан якдилман", дейилган Пугачёванинг Адлия вазирлигига мурожаатида.
16 сентябрь куни Адлия вазирлиги Алла Пугачёванинг эри Максим Галкинни "хориж агентлари" рўйхатига киритган эди. Россия Украинага уруш очганининг биринчи кунларидаёқ Галкин Кремлнинг бу ҳаракатини кескин танқид қилганди.
Россия қўшинлари Украинага бостириб кирганидан бери таниқли комик Галкин ўз фаолиятини Исроилда давом эттирмоқда.